Ni Lilali Ubufumu bwa kwa Lesa Bukesa?
“SHIKULU, bushe ni pali ino nshita mulebwesesha ubufumu kuli Israele?” (Imilimo 1:6) Abatumwa balefwaisha ukwishiba ilyo Yesu ali no kuleta Ubufumu bwakwe pano calo. Nangu ca kutila palipita imyaka nakalimo 2,000, abantu bacili balepusha abati: Ni lilali Ubufumu bwa kwa Lesa bukesa?
Apo Yesu alelanda sana pa Bufumu ilyo aleshimikila abantu, te kuti mutwishike ukutila alilandilepo pali ici cipusho. Na ka cine alilandilepo! Imiku iingi alandile ukuti kukaba inshita imo ifi iyo aitile ati inshita ya “kubapo” kwakwe. (Mateo 24:37) Muli iyi yine nshita ya kubapo kwakwe e mo no Bufumu bwa kwa Mesia bufwile ukutendeka. Bushe finshi fingatwafwa ukwishiba inshita ya kubapo kwakwe? Natulande pa fishinka fine ifyo Baibolo itweba pa nshita ya kubapo kwa kwa Kristu.
1. Inshita ya kubapo kwa kwa Kristu yali no kutendeka ninshi palipita sana inshita apo afumine pano calo. Yesu alandile cilangililo umo aipashenye ku muntu umo uwaile “ku calo ca kutali ku kuimweno bufumu.” (Luka 19:12) Bushe ici cilangililo icalesobela ifya ku ntanshi cafikilishiwe shani? Kwena Yesu alifwile no kubuuka; e lyo aya ku “calo ca kutali,” e kutila ku muulu. Nga filya fine Yesu asobele na mu cilangililo icapalana ne ci, pa kuti akabwele ku kwisateka mu bufumu bwakwe paali no ‘kupita sana inshita.’—Mateo 25:19.
Ilyo papitile imyaka imo ukufuma apo Yesu ailile ku muulu, umutumwa Paulo alembele ukuti: “Uyu muntu [Yesu] atuulile ilambo limo ilya pa membu ku ciyayaya no kwikala ku kwa kulyo kwa kwa Lesa, ukufuma lilya line alolela bakasuke abalwani bakwe ababikwa nge cipuna ca makasa yakwe.” (AbaHebere 10:12, 13) Kanshi ilyo Yesu aile ku muulu, atendeke ukulolela pa nshita ntali ilyo tabalamupeela ubufumu. Uyu Mwana asukile aleka ukulolela ilyo Yehova Lesa amubikile pa Bufumu ubo alandile kale sana ukuti bukatekwa na Mesia. Ili line e lyo inshita ya kubapo kwa kwa Kristu yatendeke. Bushe abantu pano calo bali no kwishiba ukuti ici cintu icikankaala nacicitika?
2. Ukubapo kwa kwa Kristu takumoneka na menso ya buntunse. Ibukisheni ukuti Yesu aebele abasambi bakwe icishibilo ca kubapo kwakwe. (Mateo 24:3) Nga ca kutila abantunse bali no kumona atendeka ukuteka, bushe kuti bakabila ne ca kwishibilako? Natulangilile: Tutile muli pa bulendo bwa kuya mu kumona bemba. Ilyo muleya mu nshila, kuti mwalasanga ifipabi fya kumulanga ukwabela bemba. Nomba nga mwafika pa lulamba, mwaimina mupepi na menshi muletamba na bemba ifyo apabuka, bushe cine cine kuti mwakabila ne cipabi ica kumulangilila ukuti uyu e bemba? Iyo! Nga cinshi kwingabela icipabi ca kumulanga icintu ico muleimwena na menso?
Icalengele Yesu alande icishibilo ca kubapo kwakwe, te kulangilila abantu icintu ico bengaimwena na menso, lelo kubaafwa ukwiluka icali no kucitika ku muulu. E ico, Yesu atile: “Ubufumu bwa kwa Lesa tabwakese ne fya kumwenako fya kucebusha.” (Luka 17:20) Lelo bushe fishibilo nshi ifyo aba pa calo bengamwenako ukuti inshita ya kubapo kwakwe naifika?
3. Mu nshita ya kubapo kwa kwa Yesu kuli no kuba amacushi ya kapeleko pano calo. Yesu atile inshita ya kubapo kwakwe ilyo akalateka mu Bufumu bwa ku muulu, pano calo pakaba inkondo, ifipowe, ifinkukuma, ifikuko, na bumpulamafunde. (Mateo 24:7-12; Luka 21:10, 11) Cinshi cili no kulenga amafya yonse aya? Baibolo yalilondolola ukuti Satana, “kateeka wa pano calo,” aba ne cipyu pantu alishiba ukuti inshita yakwe yalicepa sana ukutula apo Kristu atendekela ukuteka mu Bufumu bwakwe. (Yohane 12:31; Ukusokolola 12:9, 12) Ino nshita tulamona ifitulanga sana ukuti Satana ali ne cipyu cikalamba e lyo tulamona no kuti Kristu alitendeka ukuteka. Sana sana ukutula mu 1914, umwaka uo na baishiba ilyashi lya kale batila e po ifintu mu calo fyayalukiile, ifya kutulanga kuti Kristu aleteka fyalimonekesha sana mu calo conse.
Fyonse ifi twalandapo tafyawama iyo, lelo kwena kuli ifisuma ifyo ifi filetulanga. Ifi fyonse filetulanga ukuti Ubufumu bwa kwa Lesa ubo Mesia ateka, bwalitendeka kale ukuteka ku muulu. Nomba line fye, ubu Bufumu buli no kuteka icalo fye conse. Nomba bushe abantu kuti baishiba shani ukuti kwaliba ubu Bufumu pa kuti basumine ukutila imfumu Yesu ikabateke?
4. Umulimo wa kushimikila abantu icalo conse ulelanga ukuti tuli mu nshita ya kubapo kwa kwa Yesu. Yesu atile ukubapo kwakwe kukaba nge “nshiku sha kwa Noa.”a (Mateo 24:37-39) Noa tapelele fye pa kupanga icibwato; lelo aali ni “kashimikila wa bulungami.” (2 Petro 2:5) Noa alisokele abantu ukuti tapakokole, Lesa aali no kubapingula. Yesu atile abakonshi bakwe aba mu nshita ya kubapo kwakwe na bo bakulasoka abantu ukuti ubupingushi nabupalama. Asobele ukuti: “Ne mbila nsuma iyi ya bufumu ikashimikilwa pano isonde ponse ku kubo bunte ku nko shonse; e lyo ne mpela ikesa.”—Mateo 24:14.
Nge fyo twacumfwa mu cipande cifumineko, Ubufumu bwa kwa Lesa bukafumyapo amabuteko yonse ayaba pano calo. Abashimikila abantu ifya kwa Lesa balabasoka ukuti ubuteko bwa kwa ku muulu buli no kwalule fintu nomba line, pa kuti bonse abaumfwa bakapusuke ubu bonaushi no kwisaba mu Bufumu. Icipusho cacindama kanshi ca kutila, nga imwe mukacita shani?
Bushe Cikamuwamina Ilyo Ubufumu bwa kwa Lesa Bukesa?
Imbila Yesu aleshimikila abantu yalengele bakwata isubilo ilisuma sana. Kale sana, ilyo Adamu na Efa bapondweke, Yehova Lesa alandile ukuti kukaba Ubufumu bwakwe ubukawamya ifintu no kulenga abantu ba cishinka ukwikala umuyayaya muli paradaise pano calo filya fine Lesa alefwaya pa kutendeka. Ala te pa busuma ukwishiba ukutila ubufumu ubo Lesa alandile kale sana ukuti bukesa, fino tulelanda buleteka ku muulu! Ubu bufumu, te cintu ca kwelenganya fye icishaishibikwa bwino, lelo e ko bwaba icine cine!
Fino tulelanda, Yesu, Imfumu iyo Lesa asala alitendeka kale ukuteka nangu ca kutila abalwani bakwe e po bacili. (Amalumbo 110:2) Muli cino calo cabipa umwaba abantu abashipepa, Mesia alebomba umulimo uo Wishi amupeela, uwa kufwayafwaya abengatemwa ukwishiba Lesa bwino bwino no kumupepela “mu mupashi na mu cine.” (Yohane 4:24) Abantu ba mitundu yalekanalekana, aba mishinku yalekanalekana, kabili aba nkulilo shapusanapusana kuti baba ne subilo lya kwisaikala umuyayaya mu Bufumu bwa kwa Lesa. (Imilimo 10:34, 35) Tuletila na imwe bene, mukwai citenipo cimo pa kuti mukekale umuyayaya muli ubu Bufumu. Sambilileni pali ubu Bufumu bwa kwa Lesa ino ine nshita, pa kuti na imwe mukekale bwino sana ku ciyayaya muli ubu buteko umukaba fye abalungama!—1 Yohane 2:17.
[Futunoti]
a Ifi Yesu alandile filatwafwa ukulungika icilubo caba muli filya bapilibula ishiwi lya kuti “ukubapo” mu Baibolo yamo. Mu maBaibolo yamo bapilibula ili shiwi ukuti “ukwisa,” nelyo “ukubwela,” lelo aya mashiwi yonse yalangilila fye icintu icicitika pa kashita fye akanono. Nomba moneni ukuti Yesu tatile inshita ya kubapo kwakwe ikaba nge Lyeshi lyaishile mu nshita ya kwa Noa, pantu ilyeshi lyaishile mu nshiku sha kupenda no kupita lyapita. Lelo Yesu atile ikaba nge “nshiku sha kwa Noa,” iciputulwa ca nshita imo ilyo ifintu fyaibela fikalacitika. Nga filya cali mu nshiku sha kwa Noa, ukubapo kwa kwa Kristu, cifwile ukuba ciputulwa ca nshita ilyo abantu babika sana amano ku milimo yabo ica kuti bakaana no kumfwa ilyo balebasoka.
[Ifikope pe bula 8, 9]
Amalyashi ya bulanda ayo tumfwa cila bushiku yatulangilila fye ukuti icalo cisuma cili mupepi
[Abatusuminishe]
Imfuti: icikope ca ba U.S. Army