Umulandu wa Kutandalila Icikuulwa

“CINSHI bacita palya?” Ifi e fyo abapita nshila abengi bepusha nga bamona icikuulwa cikalamba ica Nte sha kwa Yehova icabela mu Mogale City (Krugersdorp), mupepi no musumba wa Johannesburg, mu South Africa. E calengele Inte sha kwa Yehova bapekanye ukuti abantu bakatandale pali ici cikuulwa pa October 12 na 13, mu 2007. Kwali ifintu fibili ifyalengele ukuti bacite ifi. Balefwaya abantu ukwishiba icishinka pa ficitika pali ici cikuulwa, no kulenga abantu ukwishiba ifyo imilimo ibombwa palya itwala pa ntanshi umulimo wa kushimikila uo Yesu Kristu apeele abasambi bakwe.—Mateo 28:19, 20.

Ababomba pali ici cikuulwa, balilembele pa bwingililo ukuti baleita abantu bonse ukwisa mu kutandala, kabili balipeele no tupepala ku bekala mupepi ne cikuulwa utwa kubetilapo ukwisa mu kutandala. Bashikwebo abo bashitako ifintu ne ndupwa shabo nabo balibetile. Bushe abantu balile? Abantu ukucila 500 abashili Nte balile mu kutandala pali ici cikuulwa.

Icintu icikalamba ico abantu batemenwe ukumona ni cimashini beta ukuti MAN Roland Lithoman icipulinta bamagazini 90,000 mwi awala limo fye. Incende balongelamo ifitabo na bamagazini ukucila amakilogramu 14,000 cila bushiku, no mo bakupila ifitabo namo mwalipapwishe abatandashi. BaNte mu fipani fyalekanalekana babombelamo, balipekenye ifintu ifingi ifya kulangisha abatandashi, pali ifi pali no kulondolwela abantu ifyo kale balepulinta impapulo ukubomfya mashini wa Gutenberg ukufika na ino nshita ilyo babomfya fimashini ifipya. Cimbi ico balangile abantu ni pa fyo aba pa maofesi ya Nte bacita pa kuti tabakoweshe umwela na menshi. Paliba fimashini ifikula umwela wabipa uufuma muli fimashini ifipanga impapulo, kwaliba ne fimasefa ifikola ulukungu lupangika ukufuma ku mapepala.

Inyunshipepala ya mu South Africa mu cipande cimo yasabankenye ukuti abantu 700 abekala pali aya maofeshi, “bantu abaipeela kuli Yehova.” Yalandile na pa ‘busaka na pa fyo bapulinta mu nshita yalinga.’ Umwaume umo uwapatile Inte sha kwa Yehova alishile na o mu kutandala. Pa numa alembele kalata ya kuti: “Kwena mulabomba bwino. Banono abaishiba ukubomba bwino nge fyo mucita.”

Abatandashi abengi balitemenwe nga nshi pa fyo bamwene kabili balipapile ukumona impapulo mu ndimi 151, balipapile na lintu baishibe ukuti apa pene e po bapulintila impapulo isho batwala na mu fyalo fimbi 18, mu fitungu fya southern na central Africa. Mwi sonde fye lyonse, abantu kuti batandalila ifikuulwa fya Nte sha kwa Yehova. Na imwe bene kuti mwatandalila ifi fikuulwa uko mwikala nga mwaipusha ku maofeshi yabo inshita batandasha.

[Icikope pe bula 14]

Abatandashi balefika pa maofeshi

[Icikope pe bula 14]

Akapepala ka kwitilapo abantu

[Ifikope pe bula 15]

Amaofeshi ya mu Mogale City ku South Africa

[Icikope pe bula 15]

Cimashini bapulintilako impapulo ico beta ati, MAN Roland Lithoman

[Icikope pe bula 15]

Umo bapangila ifitabo

[Icikope pe bula 15]

Umo balongela impapulo