Ifyo Amafisakanwa Yafula mu ma Buteko

Amafisakanwa ayo tulelandapo muli cino cipande, ni filya aba mu buteko babomfya amaka bubi bubi pa kuti ifintu filebawamina. Kabili ukubomfya amaka bubi bubi kale kwatendeke. Muli Baibolo mwaliba ifunde ilyakaanya amafisakanwa ilyo abantu balepingula imilandu, ici cilanga ukuti apo amafisakanwa yatendekela napapita imyaka ukucila pali 3,500. (Ukufuma 23:8) Amafisakanwa yalicila na pa kukanaba umufumacumi. Aba mu buteko limo limo baleba ifipe, balacita ifintu ifyo bashakwatapo insambu, e lyo baleba ne ndalama sha buteko. Kabili balabomfya amaka bakwata ku kwafwa ifibusa na balupwa na pa shilingile.

Nangu ca kuti amafisakanwa yaba fye konse, cimoneka kwati aba mu buteko e bacilamo sana. Ulupapulo lwa mu 2013 ulo beta ukuti Global Corruption Barometer, ulo akabungwe ka Transparency International kalembele, lwalandile ukuti abantu baishiba ukuti abatemwa sana amafisakanwa, ba mu tubungwe twa fikansa fya calo, bakapokola, abakwata ififulo mu buteko, aba mu cipani cipanga amafunde, e lyo na ba mu cipani cishininkisha ukuti abantu balekonka amafunde. Umfweni fimo ifyo bafwailisha.

• AFRICA: Mu 2013, aba mu buteko nalimo 22,000 mu South Africa balibapeele umulandu wa mafisakanwa.

• AMERICAS: Mu 2012, abantu 25 mu Brazil balibekete pa mulandu wa kubomfya indalama sha calo ku kongwelako abantu pa kuti batemwe akabungwe kabo aka fikansa fya calo. Pabo baikete, pali no wali ne cifulo icikalamba mu calo, uwali inkonkani ya kwa kateka uwafuminepo.

• ASIA: Mu 1995, abantu 502 balifwile mu musumba wa Seoul, ku South Korea, ilyo icikuulwa cababongolokeele. Ilyo bafwailishe umulandu icikuulwa cabongolokeele, basangile ukuti aba mu buteko abalelolekesha pa bukuule, balibapeele amafisakanwa, pa kuti basuminishe abalekuula ukukanakonka fyonse ifilingile ukukonkwa pa ku kuula icikulwa.

• EUROPE: Ba Cecilia Malmström, abangalila icipani ca European Commission, batile: “Amafisakanwa mu Bulaya yalibipisha.” Balandile no kuti, “cimoneka kwati aba mu buteko tabesha na maka ukucincintila amafisanakanwa.”

Amabuteko tayakwata amaka ya kukaanya abantu ukulapoka amafisakanwa. Ba Susan Rose-Ackerman, abasambilila sana pa fya kupwisha amafisakanwa balembele abati, pa kuti abantu bakaleke amafisakanwa, “aba mu mabuteko bafwile bayalula inshila babombelamo ifintu.” Nangu abantu batontonkanya ukuti amafisakanwa te kuti yapwe, Baibolo yalilanda ukuti amafisakanwa yakapwa.