Mulandu Nshi Mulingiile Ukusambilila Baibolo?

Bushe mwalitala amuyipushapo aya mepusho? Nga mwaliyipushapo, ninshi tamwaba mweka. Abantu abengi tabaishiba amasuko ku mepusho yacindama sana. Bushe kuti mwasanga amasuko kuli aya amepusho?

Abantu abengi kuti batila, “Ee!” Cinshi bengalandila ifi? Pantu balisanga amasuko ku mepusho ya mu Baibolo. Bushe kuti mwatemwa ukwishiba ifyo Baibolo ilanda? Nga kuti mwatemwa, Inte sha kwa Yehova kuti baleisa mu kusambilila Baibolo na imwe ukwabula ukumulipilisha.a

Abantu bamo tabafwaya ukusambilila Baibolo, e cilenga baletila: “Nalipamfiwa.” “Yalikosa ukumfwa.” “Nshakulakwata inshita ya kucita ifintu fimbi.” Lelo abantu bambi balasumina ukusambilila Baibolo pantu balafwaya ukwishiba ifyo isambilisha. Natulandeko pali bamo:

• “Nalipepeleko ku Katolika, kuli ba Protestanti, kwi tempele lya ba Sikh, na ku ba Buddha, kabili nalisambilile ne fya mapepo ku yuniversiti, lelo nshasangile amasuko ku mepusho nakwete pali Lesa. Bushiku bumo, Nte umo alishile pa ng’anda pa mwandi. Nalitemenwe ifyo aleyasuka amepusho nakwete ukubomfya Baibolo, ne ci calengele ntendeke ukusambilila Baibolo.”—Ba Gill, England.

• “Nalikwete amepusho ayengi pa bumi, lelo nshaleumfwikisha ifyo bashimapepo balenjasuka. Nomba Nte umo alyaswike amepusho yonse ayo nakwete ukubomfya fye Baibolo. Ilyo anjipwishe nga kuti natemwa ukusambilila Baibolo, nalisumiine.”—Ba Koffi, Benin.

• “Nalefwaisha ukwishiba ifyaba abafwa. Nasumiine ukuti abafwa kuti bacusha aba mweo, lelo nalefwaisha ukwishiba ifyo Baibolo isambilisha. Natendeke ukusambilila Baibolo no munandi uwali Inte ya kwa Yehova.”—Ba José, Brazil.

• “Nalebelenga Baibolo, lelo nshaleumfwikisha ifyo nalebelenga. Nomba ilyo ba Nte bantandalile, balingafwile ukumfwikisha amasesemo ya mu Baibolo ayengi. Nalefwaisha ukwishibilapo na fimbi.”—Ba Dennize, Mexico.

• “Naletwishika nga ca kuti Lesa alansakamana, e co nalipepele kuli Lesa. Ubushiku bwakonkelepo, ba Nte balishile pa ng’anda pa mwandi, kabili nalisumiine ukusambilila Baibolo.”—Ba Anju, Nepal.

Ifi twalandapo filatwibukisha amashiwi Yesu alandile ayatila: “Balipaalwa abaishiba ukuti balakabila ifya kwa Lesa.” (Mateo 5:3) Ca cine, mu cifyalilwa fye abantu balafwaya ukwishiba Lesa. Lesa fye e wingafwa abantu ukwishiba icine nga ca kuti balesambilila Icebo cakwe, Baibolo.

Finshi ficitika pe sambililo lya Baibolo? Bushe ukusambilila Baibolo kuti kwamwafwa shani? Icipande cikonkelepo calayasuka aya amepusho.