Ifyo Mwingacita pa Kuti Muleisambilisha Bwino Baibolo no Kutemwa Ifyo Muleisambilisha

YOSHUA alikwete umulimo uukalamba. Ali no kutungulula uluko lwa bena Israele no kubengisha mu Calo ca Bulayo, kabili uyu mulimo wali no kuba uwayafya. Na lyo line Yehova amwebele ukuti akatunguluka kabili amukoseleshe ati: ‘Ushipe fye kabili ukose sana. Ulekonka fye amafunde yandi. Ulebelenga ifyalembwamo akasuba no bushiku, pa kuti ulepoosa amano ku kulakonka amafunde yonse. E lyo ukatunguluka kabili e lyo ukaba uwa mano.’—Yosh. 1:7, 8.

Tuleikala mu “nshita ishayafya nga nshi,” e ico imikalile ileyafya sana. (2 Tim. 3:1) Na ifwe kuti twatunguluka nga tulekonka ifyo Yehova atweba nga fintu Yoshua acitile. Tulingile ukulabelenga Baibolo lyonse no kulakonka amashinte ya mafunde ayabamo pa kuti tulesala bwino ifya kucita.

Na lyo line, fwe bengi tatwaishiba ifya kucita pa kuisambilisha kabili tatwatemwa sana ukuisambilisha. Apo ukuisambilisha Baibolo kwalicindama, moneni akabokoshi kaleti “Esheniko Ukucita Ifi” pa kuti mumone ifingamwafwa ukulaisambilisha bwino no kutemwa ifyo muleisambilisha.

Uwaimbile amalumbo atile: “Nengeni ukwenda mu nshila ya mafunde yenu, pantu e mo nsansamukila.” (Amalu. 119:35) Kuti mwanonkelamo sana mu kubelenga Icebo ca kwa Lesa. Mukasanga icuma icaba mu Baibolo nga mulecifwayafwaya.

Nangu ca kuti tamwakwata umulimo wa kutungulula uluko nga fintu cali kuli Yoshua, mulakwata amafya. Kanshi muleisambilisha no kulakonka ifyalembwamo pa kuti ifintu filemuwamina nga filya cali kuli Yoshua. Nga mulecita ifi, mukatunguluka kabili mukaba na mano.