Umukululo Wa Fipusho

◼ Ni shani fintu tufwile ukumona ifya makwebo mu cilonganino?

Ici cipusho calyanguko kwasuka nga twalishiba bwino bwino imifwaile ya kulongana na bamunyinefwe no kubishanya. Umulandu tusangilwa ku kulongana no kubishanya na bamunyinefwe wa kukoseleshiwa lwa ku mupashi. (Heb. 10:23-25) Kanshi, te kuti cilinge ukusanshamo nampo nga makwebo, nelyo icili conse icingatupaasula ku mifwaile ya mu Malembo iya kulongana.

Pa numa ya kupoosa imyaka itatu ne cilonganino ca ku Efese, umutumwa Paulo aali na maka ya kusosa na kampingu wasanguluka ati: “Nshakumbilwe silfere, nangu ni golde, nangu fya kufwala fya muntu nangu umo.” (Imil. 20:33) Paulo alikaaninine ukukumbwa ifintu fya bene kabili taalefwaya ukubomfya icine nga kaliilo.

Amayanda ya Bufumu nelyo amasambililo ya citabo atemwa ukulongana kukalamba ukwa Nte sha kwa Yehova te kwa kuleta ifya makwebo fya pa lwesu nelyo ukufwaya aba ncito, lelo, fyabelako ukulanshanya kwa ku mupashi no kubishanya, ilyo tushilatendeka, ilyo tulelongana, na pa numa. Ukukantaika ifya makwebo ku kuyemba kwa ku mupashi ukwa kubishanya kwa Bwina Kristu kanshi kuti kwalange fyo tatwakatamike fya ku mupashi nangu panono.

Bamo balishibe fyo bamunyina abengi tabakwata amakamera na muli fyo balacita ubukwebo bwa kukopa pa mabungano na pa kulongana kumbi ukwa bantu ba kwa Yehova. Takwaba icalubana ku kukwatako icikope ca uku kubungana kwaibela. Nga munyina atukopa no kutweba ukulipila fye ishingabomfiwa ku kushita no kusamfisha filimu, te bukwebo. Lelo, abengi abakopa balamwenamo icibwesha, na muli fyo bacita ubukwebo. Tatulingile ukuleka bakantaika ukuyemba kwa kubishanya kwa Bwina Kristu ku bukwebo na ifwe tatulingile ukubabomfya. Cimo cine na ku makwebo yambi. Ukulongana kwabelako fye ukupepa Yehova, ukulya pe tebulo lyakwe ilya ku mupashi no kuipakisha ukukoseleshanya.—Rom. 1:11, 12.