Ukusensenunwa ku Kusabankanya Amakwebo Ukwingi
“TATA, bushe cinshi ico umweshi ufwile ukusabankanya?” Ili lipusho lya kusungusha, ilyaipushiwe no mwana, lyamoneke mu nshintu shalembelwe na Carl Sandburg mupepi ne myaka 50 iyapita. Nalimo ku ntanshi, ilipusho lya musango yu talyakaletusungusha. Ukulingana na magazini wa New Scientist, babili abayangalila ifya kusabankanya amakwebo mu London balefwaya ulubuuto lwa kasuba lukalesanika ilyashi lya makwebo pa mweshi.
Elenganyeni fintu cingaba ukubomfya umweshi nge cipampa ca kusabankanishishapo amakwebo! Elenganyeni ulwa kusabankanya ilyashi lya makwebo ku bantu mwi sonde lyonse, kuti fyaba fyebo ifyo abalemona bashingashimya, ifyo bashingacilinganya, ifyo bashingapoosa pa cishala, atemwa ifyo bashingashimya ukubomfya icibombelo ca kwashishako TV akatalamukila. Limbi aya mapange te kuti yamusekeshe, lelo bambi kuti bayamona ngo kucimfya kukalamba.
Nangu cingati ukusabankanya amakwebo kucili takulafika ku mweshi, pe sonde pena palitebelelwa. Amaperesenti 60 aya mabula yasangwa muli bamagazini na banyunshipepala abengi aba ku Amerika yabomfiwa ku kusabankanya amakwebo. Inyunshipepala ya The New York Times iya pa Mulungu peka fye kuti yakwata amabula 350 aya malyashi ya makwebo. Imilabasa imo ipoosa amaminiti 40 mwi awala limo ku kusabankanya amakwebo.
Na cimbi ni televishoni. Ukufwailisha kumo kusoso kuti cila mulungu abacaice abena Amerika bapoosa amaawala yatatu ku kutamba ifya makwebo pa televishoni. Ilyo bakapwishe sukulu lya ku sekondari, bakaba nabatamba amalyashi 360,000 aya makwebo pa TV. Batelevishoni basabankanya amakwebo mu fibansa fya ndeke, mu miputule ya fipatala umwikala abalefwaya ukumona dokota, na mu masukulu.
Nomba ifyangalo fyalumbuka fyaba e nshila ikalamba iya kusabankanishishamo amakwebo. Bamotoka babomfya mu kucimfyanya balembwapo ifya kusabankanishishapo amakwebo. Abengi aba fyangalo balanonke cuma icingi ukufuma kuli bakasabankanya ba makwebo. Kalapashi umo uwa basketball anonkele amadola 3.9 milioni mu kuteya basketball. Lelo lintu aafwile bakasabankanya ba makwebo ukusombola ifipe fyabo bamulipiile imiku 9 ukucila pa sho anonkele mu kuteya basketball.
Ukusabankanya amakwebo kuwiile nge fishimu. Ukusabankanya amakwebo kucitwa pa fibumba, mu mabasi, na mu fimbayambaya. Kuyemfya mu kati ka matakisi ne fitesheni fya mashitima yapita pa nshi—na ku fibi fya fimbusu fya cintubwingi. Tulomfwa amalyashi ya makwebo lintu tuli mu matuuka yakalamba, mu mashitolo, mu fikwepe—na lintu tuli pa foni tulepembela ukulanda na umo. Mu fyalo fimo amalyashi ya makwebo ayengi yeshila muli bakalata ica kuti abengi abayapokelela bayapoosa fye mu ng’ungulu.
Ulupapulo lwa Insider’s Report, ulusabankanishiwa na McCann-Erickson, akampani akasabankanya amakwebo mwi sonde lyonse, lutungo kuti mu 1990 amadola amabilioni 275.5 yalipooselwe mu kusabankanya amakwebo mwi sonde lyonse. Ukutule lyo, ishapooselwe shafikile ku madola amabilioni 411.6 mu 1997 e lyo mu 1998 ishileenekelwa ukupooswa madola amabilioni 434.4. Isho ni ndalama ishingi nga nshi!
Cinshi cifumamo muli aya matukuto? Incenshi imo itila: “Ukusabankanya amakwebo ni cimo ica mibombele yakwatisha amaka mu bwikashi. . . . Ukusabankanya amakwebo takulenga fye ifipe ukushitwa. Lelo kulasembeleka abantu ukusumine mimwene imo, ifyakatamikwa, amabuyo, imfundo sha fintu twaba na fintu tulingile ukuba . . . Kulaalula imitima yesu kabili imitima yesu ilaalula imisango yesu.”
Apantu tatwingasengauka ukusabankanya amakwebo, mulandu nshi tatwingafwaila ukwishiba fintu kubomba e lyo na fintu kwingamwambukila?