Bomfya Bamagazini ku Kwakana Icine
1 Ukukatama kwa fyebo fya cine, ifyabamo ifishinka kwalinyantawilwa apakalamba muli sosaite wa lelo pa mulandu wa kusabankanya kwa makukumya, amalayo ya bupolitiki aya kulufya, no kutunga kwa kukopeka ukwa pa kati ka nko. Ulupungu lwa kwa Kalinda na Loleni! fyaba ifyaibela mu kuti e fyeka fye fibilisha icine pa lwa Bufumu bwa kwa Lesa no kulondolola cintu bonse bafwile ukucita pa kuipakisha amapaalo ya ciyayaya yantu bukaleta.
2 Mu calo cimo mushika wa ciputulwa ca buteko ica kusabankanye fyebo uwatesekeshe ubucindami bwa aba bamagazini babili mu kuitemenwa ayafwilishe ukukwata ukusuminisha kwa kwananishiwa kwabo. Alondolwele ukuti: “Nanguluka Ulupungu lwa kwa Kalinda ukuba umo uwa bamagazini bawamisha; ndi uwa nsansa nga nshi ku kwafwilisha.” Caliba lishuko lyesu ukwaafwako bambi ukupitila mu kwananya aba bamagazini abengapeela ubwishibilo bupeelo bumi. (Yoh. 17:3) Ni shani fintu ukatambika aba bamagazini bacindama mu kati ka May? Nakalimo imitubululo yakonkapo ikaba iya kwaafwa.
3 Nga ca kuti ulelangisha ifipande fya kwiswila mu “Ulupungu lwa kwa Kalinda” ulwa May 15, kuti pambi watila:
◼ “Tulelanda ku bantu pa lwe buuku ilyacilapo kushitwa mu calo conse. Bushe namulishiba? [Leka asuke.] Tulelanda pali Baibolo. Kufwile kwalibako umulandu uusuma nga nshi uyo abantu bafulishe fi bashitila Baibolo. Umulandu usangwa pali 2 Timote 3:16.” Pa numa ya kubelenga ilembo, ebekesha ifishinka fyalinga muli cimo ica fipande.
4 Nelyo pa numa ya mitendekele ipi, kuti pambi wasosa icintu cimo pamo nge fi:
◼ “Napamo mwalishiba ukuti abantu bamo basoso kuti: ‘Nga naibelengela Baibolo pa lwandi, ico cili icakumanina.’ Cili ca cine ukuti abantu abengi kuti basambilila ifingi pa kubelenga Baibolo pa lwabo. Nga ca kuti ukukuntwa kwabo kuli kusambilila icine pa lwa kwa Lesa ne mifwaile yakwe, ico balecita cili icatashiwa apakalamba. [Belenga Imilimo 17:11.] Lelo, ukuba abafumacumi kuli fwe bene, bushe mu cituntulu tuli no kumfwikisha ubupilibulo bwa ciko conse ukwabulo kwaafwa?” Leka asuke. Lyene londolola fimo ifya fisambilisho fya Baibolo ifyo umo alekabila ukumfwikisha mu milandu ya butotelo nga fintu filandilwepo mu fipande fya kwiswila ifya Ulupungu lwa kwa Kalinda ulwa May 1 kabili ebekesha ukucindama kwa kupoka ukulembesha ukwa Ulupungu lwa kwa Kalinda.
5 Mu calembwa cobe ica fipempu fya kubwelelamo, mu kupalishako walikwatamo abo balangile ubuseko bunono pa kutendeka, lelo takwatalile akufuma nangu cimo. Apantu kwaliko fye ukwankulako kwapelela, te kuti pambi uyumfwe ukukabila kwa kutwalilila ukubwelelako. Lelo kuti pambi waba na maka ya kubomfya uyu mutande ku kulundulula impito ya magazini. Lintu wamona icipande cintu uleyumfwa cingepukisha ku muntu umo, cipange ubuyo ukutandalila uyo muntu ku kumutambika magazini no kumukoselesha ukulembesha.
6 Ubunte bwa mu Lyashi: Iyi yaba ni nshila yawamisha iya kucincimusha ubuseko muli bamagazini. Ukusansalika kwabamo kushilimuka ukwa nkupo sha kucebusha kuti pambi kwaba ukwakumanina ku kutendeka ukulanshanya. Nkashi umo abikile bamo abafumine pe desiki lyakwe pa kuti bakabomba banankwe bengamona bene lintu balepitapo; aali na maka ya kushalika abafulilako. Cipange ubuyo ukusendako amakope yafulilako, kabili bula ukuitendekelako ukutambika yene uno mweshi lintu uleya ku kushita, lintu uleya ku sukulu, lintu uli muli basi, nelyo lintu wakumana na bambi kumbi.
7 Mu kuba no kwaafwa kwa Ulupungu lwa kwa Kalinda na Loleni!, twalisanga ifyasuko ku fipusho fyakatama pa lwa kwa Yehova no kupepa kwakwe. Tulefwaya ukubomfya aba bamagazini mu nshila iili yonse iingabako ku kwaafwako bambi ukwisa ku kwishiba “Yehova, Lesa wa cishinka.”—Amalu. 31:5.