Bakomfwa Shani Ukwabula Ukubwelelako?
1 “Bakomfwa shani, apabula kabila?” (Rom. 10:14) Mu cine cine, bakomfwikisha shani ubupilibulo bwa cine ukwabula ukucita ifipempu fya kubwelelamo ififumamo cimo? Ukutandala ukuli konse tucita ku kulanshanya na bene mayanda pa lwa bukombe bwa Bufumu kwawaminwa icipempu ca kubwelelamo. Uno mweshi kuti pambi twaba na maka ya kukonkelela ukulanshanya kwesu ukwa kubalilapo mu kuba na matontonkanyo yalundwapo aya mu Malembo ukufuma muli broshuwa uuli onse uyo twashalike, kabili ico kuti pambi catungulula bwino mwi sambililo lya Baibolo.
2 Nga ca kuti washalike broshuwa wa “Bushe Lesa mu Cituntulu Alatusakamana?,” kuti pambi waba na maka ya kutendeka ukulanshanya uko kwingatungulula mwi sambililo lya Baibolo muli iyi nshila. Ukusonta ku cikope pa mabula 2-3, kuti waipusha ukuti:
◼ “Bushe kuti mwatemwa ukwikala mu calo umo inshita ya ku ntanshi iyaikashiwa yaba iyaebekeshiwa kuli imwe no lupwa lwenu? [Leka ankuleko. Lyene alukila ku maparagrafu 1 na 2 aya Ulubali 1.] Ifwe bonse tulaakana uku kufwaisha, nangu ca kuti abengi balatwishika nga cikatala acicitika. Kuli Lesa, uwalaya ukulenga ici ukuba ica cine cine, kuti cacitika.” Belenga Esaya 32:17, 18 ukufuma muli Baibolo yobe. Konkanyapo, ukulondolola ukuti kwalibako abantu ukushinguluka icalo abo kale kale balekumanya ubuseko no mutende wa muntontonkanya ifyo fifuma mwi subilo lyashininkishiwa ilya nshita ya ku ntanshi. Lanshanyeni amatontonkanyo ya mu Malembo muli paragrafu 4 iya Ulubali 2, kabili lyene londolola ifyo ukusambilila broshuwa kwingaafwa mwine ŋanda ukusambilila ifyafulilako. Cita amapekanyo ya cipempu ca kubwelelamo ica mu kubangilila ku kutwalilila ukulanshanya.
3 Lintu wabwelelako pa numa ya kushalika broshuwa wa “Inte sha kwa Yehova mu Mwanda wa Myaka Walenga Amakumi Yabili,” napamo icintu cimo icapala ici kuti caba ica kufumamo cimo:
◼ “Pa kutandala kwandi ukwafumineko, twalanshenye pa cipusho ca kuti, Nga ca kuti Lesa kutemwa, mulandu nshi asuminishisha ububifi? Bushe muletontonkanya ukuti Lesa alatusakamana icalinga ku kuleta impela ku kucula no lukaakala? [Pa numa ayankulako, alukila ku maparagrafu 2 na 3 pe bula 27, kabili konkanyapo.] Lesa alilaya ukupyanika cino calo cibifi ku cipya icaikalwamo na bantu basuma abakaba na maka ya kwikala mu mutende. [Belenga Ilumbo 37:11.] Ine na imwe ne fwe bene kuti twaipakisha ubumi muli cilya calo cipya nga ca kuti twatetekela Baibolo no kubomfya ukufunda kwa iko.” Londolola ukutantika kwesu ukwa kwaafwa abantu ukusambilila Baibolo.
4 Lintu wacita icipempu ca kubwelelamo pa numa ya kushalika trakiti wa “Cinshi Cintu Inte sha kwa Yehova Basumina?,” uku kulandapo ukwipi kuti pambi kwabalamuna ukulanshanya:
◼ “Pa mpela ya kulanshanya kwesu ukwalekelesheko, namushilile trakiti uwakwete umutwe wa kuti, Cinshi Cintu Inte sha kwa Yehova Basumina? Ninkwatako kope walundwapo uwa trakiti pano. Moneni, paragrafu wa cibili pe bula 4 emishe ifipusho ifili ifya kulengo buseko kuli ifwe, Lelo ni shani fintu Ubufumu bwa kwa Lesa bukesa? Pa kunakila kwa bantu bonse mu kuitemenwa kuli kamfulumende wa kwa Lesa?” Belenga paragrafu. Lungatika mwine ŋanda ku kamutwe kanono akakonkelepo, akaleti ‘Isubilo ku Nshita ya ku Ntanshi,’ kabili lanshanya cintu Inte sha kwa Yehova basumina ukuti e cikacitika ku nshita ya ku ntanshi. Peepekako ku cintu ali no kusosa kabili konkamo mu kulinganako.
5 Lintu twasanga abantu bafumaluka abalesapike cine, tulangisha ukutemwa kwesu ukwine kwine pa kubwelelako ku kubaafwa ukubombela pa cintu baumfwa. Tubomfya icine cashila icaseekeshiwa kuli ifwe kwi paalo lya ciyayaya ilya ifwe fwe bene na abo abakutika.—1 Tim. 4:16.