Afwa Bambi Ukusambilile Cine
1 Yesu aishile kwi sonde ku kucitile cine ubunte. Ku kukwata icine ukushimikilwa kuli bambi, akanshishe abasambi bakwe ukuba bakasambilisha. Aali uwacetekela nga nshi ulwa kutunguluka kwabo mu kusambilisha bambi ica kuti abetile ‘bakafundisha ba pa cintubwingi.’ (Mat. 13:52, NW) Apashenye umo na umo ku muntu wasambilila uwakwata icipao ca fyuma icikalamba umwa kufumya. Abasambi ba kwa Yesu ilelo babomfya amabuula yapulintwa ku kukalakasha umulimo wa kushimikila Ubufumu. Ku ca kumwenako, ifilonganino ifingi fyalikwata amabroshuwa yalekanalekana aya kubomfya ku kwaafwa bambi ukusanguka abasambi. Ni shani fintu ifi ifibombelo fyakatama fingabomfiwa?
2 Broshuwa wa Bushe Lesa mu Cituntulu Alatusakamana? alondolola mu kubamo ukupelulula ifyo icalo cipya icalubuka ukufuma ku kucula cili mupepi. Ni shani twingalondolola yene? Imitubululo kuti yasangwa mu citabo ca Ukupelulula pe samba lya mutwe ukalamba “Ukucula,” ukutampila pe bula 309, nelyo kuti pambi wasalapo imitendekele pe bula 12 pe samba lya mutwe “Ulufyengo/Ukucula.”
3 Kuti pambi watila:
◼ “Bushe mwalitala amupapa ukuti, Bushe Lesa mu cituntulu alasakamana ukuti abantunse balapita mu lufyengo no kucula?” Leka ankuleko. Belenga Ilumbo 72:12-14. Lyene kupukula pe bula 23 ilya broshuwa wa Bushe Lesa mu Cituntulu Alatusakamana? no kulanshanya umutwe uli mu filembo ifikalamba mu Lubali 10, pamo pene no bupilibulo bwa cikope pe bula 23. Nga ca kuti broshuwa yakaanwa, mulandu nshi te kutambikila trakiti, pamo nga Ukusansamusha ku Bapopomenwa nelyo Ubumi mu Calo Cipya Ica Mutende?
4 Mu kupalishako uli no kukwata amashuko ya mu nshita ayengi aya kutambika amabroshuwa. Pano palipo inshila imo iyo wingabomfeshamo broshuwa wa “Inte sha kwa Yehova mu Mwanda wa Myaka Walenga Amakumi Yabili.” Kuti pambi watila:
◼ “Abantu abengi balipusha ifipusho pa lwa Nte sha kwa Yehova, ukufwaya ukwishiba ifintu fimo pa lwa fisumino fyabo ne mibombele. Muli uno broshuwa [langisha inkupo, belenga umutwe, lyene kupukula pa mabula 26-7] muli no kusanga ukusupawila kwa fipusho ifyo ilingi line ifipushiwa na bantu abalesekelela.” Pa numa ya kulanshanya ifishinka finono pali aya mabula, tambika broshuwa.
5 Kuli imwe mwe bali abapya mu mulimo wa mwi bala, kuti pambi mwafwaya ukusoso kuti:
◼ “Nomba line nasangwike umo uwa Nte sha kwa Yehova pa mulandu wa kufwailisha imibele yawamishiwako mu bumi, ukubishanya uko ukutemwa kwaba mu kusaalala kwa calo te mulandu no mushobo nelyo uluko. Napaapaata pokeleleni ubu bukombe bwapulintwa ngo bupe.” Peela trakiti wa Cinshi Cintu Inte sha kwa Yehova Basumina? Nelyo, nga ca kuti uli wa myaka iinono, kuti pambi wacisanga ukuba icayanguka ukusoso kuti: “Ndekanshiwa ku bafyashi bandi ukulangisha ukwangwako ku bantu bambi. Imo iya nshila ningacitilamo ifi ili kutandalila abena mupalamano bandi mu kuba no bukombe bwa kukoselesha ukufuma muli Baibolo. Uyu broshuwa ali no kumwaafwa ukwishiba bantu Inte sha kwa Yehova baba na cintu basuminamo.” Tambika broshuwa wa Inte sha kwa Yehova mu Mwanda wa Myaka Walenga Amakumi Yabili pa musangulo wa lyonse. Abafyashi bobe nelyo bambi abali nobe kuti bafwaya ukukwaafwa ukulundulula ubuseko wasanga.
6 Nga ca kuti ulebomfya amabroshuwa yambi mu butumikishi uno mweshi, kuti pambi wapanga imitendekele yobe ne mipeelele ukushintilila pa mitubululo ili pa muulu. Ibukisha ukwipifya no kucita ukulandapo kwashininkishiwa kabili ukwa kukuulilila ku kwimya ubuseko bwa bene mayanda.
7 Yehova alitupeele cine. Tulingile ukushukila amashuko ya mu nshita ayabikwa pa ntanshi yesu ku kwakana cene na bambi, ponse pabili mu musango wapulintwa na mu malyashi yesu na bantu tukumanya. Muli iyi nshila tuishininkisha fwe bene ukuba bakafundisha ba pa cintubwingi ku kunonkelamo kubelelela ukwa bambi.—Mat. 28:19, 20.