Mulandu Nshi uwa Kusungila Ifyalembwa fya Bashiba pa Mayanda?
1 BaNte baupana babili bafumine mu mulimo wa mwi bala lucelocelo. Pa numa pali bulya bwine bushiku, balibwelelemo ku kuyatandalila abashali pa mayanda muli cilya cifulo ca kubombelamo. Umwaume umo alibetile ukuti bengile mu ŋanda kabili alikutike mu kusakamanishisha. Apokelele icitabo ca Ikala Kuli Pe na pe no kulomba ishi Nte ukubwelelako. Tatalile alandapo ne Nte sha kwa Yehova kabili alikwete ifipusho ifingi ifyo alefwaya ukumwasukila; isambililo lya Baibolo lyalitampilwe. Aba abaupana babili balisekelele nga nshi pa kusanga umuntu wapale mpaanga uwa musango yu. Bushe kuti watemwa ukukwata ica kukumanya icapalako? Ukusunga bwino ifyalembwa fya bashiba pa mayanda no kubwelelako mu kwangufyanya kuti kwalenga iwe ukufikilisha ico.
2 Libili libili twalyebwa ukusunga ifyalembwa fya bashiba pa mayanda no kubwelelako mu kwangufyanya. Nga fintu fye ica kukumanya cili pa muulu cilelangilila, ukubwelelako inshita imbi pa bushiku bumo bwine kuti kwaletako ifya kufumamo fishaiwamina. Ilintu kuti pambi twapampamina pa kufimba icifulo ca kubombelamo ico twapeelwa, napamo tatwaba aba mukoosha sana mu kusunga ifyalembwa fya bashiba pa mayanda. Bamo basoso kuti: ‘Tulabombela mu cifulo cesu pa numa ya milungu ibili nelyo itatu lyonse; tatukabila kusunga ifyalembwa fya musango yo apantu tulabwelelako mu kwangufyanya nga nshi.’ Lelo ico citupeela fye no mulandu walundwako uwa kusungila ifyalembwa. Nga ca kuti tulafimba icifulo cesu libili libili, ukubwelela ku bashiba pa mayanda kutulenga ukupwishishisha bwino ukusapika kwesu abayana. Mu nshila nshi?
3 Mu ncende ishingi, amaperesenti 50 aya bantu tababa pa mayanda mu kasuba. E co, kanshi, tulakwata icifulo ca kubombelapo icalundwako pa kutontomesha pa bashiba pa mayanda. Nangu cingati icifulo tacibombelwamo libili libili, kuti twawamyako ififumamo lintu twabombesha ku kufika pa uli onse pa ntanshi ya kulangilila ukuti icifulo cesu nacibombelwamo.
4 Ukutandalila abashiba pa mayanda ilingi line kuti kwacitwa ubushiku bumbi, nga cingacitika mu kati ka uyo wine mulungu. Abengi bacisanga ukuba icisuma ukubwelelako pa bushiku na pa nshita iyapusanako kuli ilya intu baileko pa kubalilapo. Kuti pambi wasalapo ukubomfya inshita imo pa Cibelushi nelyo pa Mulungu ukubwelela pa bashiba pa mayanda abo walembele mu kati ka mulungu. Lyene na kabili, ifilonganino ifingi fisango kuti ukucite co mu cungulo kasuba kwalifumamo ifisabo. Kuti pambi basanga abene mayanda ukucila pali citika.
5 Ulingile ukulemba ifipempu fya kubwelelamo mu fyalembwa fya pa lobe. Nga ca kuti wafilwa ukubwelela ukushali abantu, ulingile ukupeela ifyalembwa fyobe ifya bashiba pa mayanda kuli munyina angalila ibumba lyenu, pa kuti fingabomfiwa kwi bumba limbi ilikayabombela muli cilya cifulo.
6 Ukupeela ukusakamana kwapalamisha kuli ulu lubali lwa butumikishi bwesu kuti kwaingilishako ukusandulula kwesu capamo no buseko bwesu. Kuti twaikushiwa lintu twaishiba ukuti tulesapika no kusakamana abapale mpaanga mu kukumanina.—Esek. 34:11-14.