Nga Mwasanga Abantu Tabali pa Ng’anda
1. Bwafya nshi tusanga lintu tulebila imbila nsuma ku ng’anda ne ng’anda?
1 Mu fifulo ifingi cileyafya sana ukusanga abantu pa ng’anda. Muli ishi ‘nshita shayafya’ abantu abengi balebomba amaawala ayengi pa kuti fye basange umwa kulila. (2 Tim. 3:1) Bamo balafuma pa ng’anda baya mu kushita ifintu nelyo ukuya fye mu kwangala. Kuti twacita shani pa kutila tukashimikile aba bantu bonse imbila nsuma?
2. Bushe kuti twacita shani pa kuti abantu tushisangile pa mayanda nabo baumfwa imbila nsuma?
2 Sungeni Icalembwa: Ica kubalilapo ico mufwile ukucita kulemba amayanda apashili abantu. Ukucite fi kwalicindama sana nga mubombela mu cifulo libili libili. Bushe mulalemba umusebo, inambala ya cifulo bamupeela, ishina lyenu, e lyo no bushiku bamupeele ici cifulo ca kubombelamo? Kuti mwashako apa kulembela ifyebo na fimbi lintu mwaya na kasabankanya umbi mu kubombela mu mayanda umo mushasangile abantu. Ilyo mwapwa ukushimikila mu cifulo bamupeele, ibukisheni ukupeela kasabankanya umbi uo bapeela ico cifulo ifyebo fyonse ifyo mwalembele, kano fye nga atila mutale mupwishe ukubombela mu mayanda umo mushalesanga abantu.
3. Ni nshila nshi shimo shimo isho mwingabomfya pa kulanda na bantu abo mushisanga pa mayanda?
3 Bweleleniko Inshita Imbi: Nalimo abo mushasangile pa mayanda akasuba limbi kuti mwabasanga icungulo nelyo pa Cibelushi nangu pa Mulungu. Bushe kuti mwatantika bwino pa kuti mwabwelelako pa nshita ilyo mwingabasanga? (1 Kor. 10:24) Nga mwafilwa ukubwelelako, kuti mwaeba kasabankanya umbi uwingaya kuli abo bantu mushasangile pa mayanda. Lelo nga mulefwaya, kuti mwabalembela ukubalondolwela ico mwatandalile nangu ukulanda nabo pa foni. Bakasabankanya abalwalilila abashibomba sana ku ng’anda ne ng’anda nalimo kuti batemwa ukumwafwako.
4. Cinshi cilelangilila ukuti calicindama ukubwelela ku bantu tushisanga pa mayanda?
4 Ica kumwenako twalalandapo cilelanga umulandu cacindamina ukubwelela kuli abo tushisanga pa mayanda. Bakasabankanya bamo balebwelela pa ng’anda imo ine pa myaka itatu ukwabula ukusanga umwine wa ng’anda. Bushiku bumo basukile bamusanga. Kanshi uyo muntu pali iyo myaka yonse alelolela fye Nte pa kuti atwalilile ukusambilila Baibolo pantu uko afumine ilyo talakukila kuli ico cifulo alesambilila.
5. Ni lilali twingalanda ukuti twapwisha ukubombela mu cifulo batupeela ukushimikilamo?
5 Pwisheni Ukubombela mu Cifulo Bamupeela: Bushe ni lilali twingalanda ukuti twapwisha ukubombela mu cifulo batupeela ukushimikilamo? Ni lilya twaesha na maka ukutandalila amayanda yonse ayaba mu cifulo cesu twasuka twalandako nangu fye no muntu umo pa ng’anda imo imo. Nalimo kuti cawama ukusha trakiti nelyo magazini ya kale pa mayanda apashiba bantu cikulu fye abapita nshila tabalefimona. Kuti twasha ishi mpapulo maka maka mu fifulo umo tushibombela lyonse. Mufwile ukupwisha ukubombela mu cifulo bamupeela mu myeshi ine. Nga mwapwisha, mulingile ukweba umubomfi upeela ififulo fya kushimikilamo pa kuti alemba bwino bwino ifyalembwa fyakwe.
6. Mulandu nshi tulingile ukulandila imbila nsuma na bantu bonse mu cifulo cesu ica kubombelamo?
6 Tulefwaya ukuti abantu abengi bakwate ishuko lya kusambilila ukulilila kwi shina lya kwa Yehova pa kuti bakapusuke. (Rom. 10:13, 14) Na bantu abo tushisanga lintu tuleshimikila ku ng’anda ne ng’anda, na bo kuti twatemwa basambilila. Filya fine umutumwa Paulo abombele, na ifwe tulingile “ukushimikisha ubunte imbila nsuma ya cikuuku ca bupe fye ica kwa Lesa.”—Imil. 20:24.