Ukusangwa Lyonse ku Kulongana—Kwalicindama pa Kuti Twingeminina Abashangila
1 Umutumwa Paulo atucincisha ukuba “abatuntulu mu citetekelo.” (Tito 1:9, 13) Ku kulongana, tulasambilila ifintu ifya mano. Tulasambilishiwa ifyo twingafwala bwino ifya bulwi fya ku mupashi pa kuti twingaba “abakosa ku kushangilile fya kubeleleka fya kwa Kaseebanya.”—Efes. 6:11; Fil. 4:8.
2 Ukulongana Kulatupayanishisha Ifyo Tukabila: Ukusangwa lyonse ku kulongana kwalicindama pa kuti twingeminina abashangila. (1 Kor. 16:13) Ku kulongana, tulapepa amapepo ya kutasha Lesa no kumulumbanya. Tulapepelako ne cilonganino ne fyo cilekabila. (Fil. 4:6, 7) Ukwimbako inyimbo sha Bufumu kulatucincimusha no kutulenga ukulumbulula ukuyumfwa kwesu ilyo tulepepa Yehova. (Efes. 5:19, 20) Ukubishanya kwesu pa Ng’anda ya Bufumu ilyo ukulongana kushilatendeka na lintu kwapwa, kulatukuula no kutupembesula.—1 Tes. 5:11.
3 Mu April umwaka wapwile, ilyashi lyaibela ilyaleti “Bucibusa bwa Cine na Lesa na Banensu,” lyalitwafwile bonse ukutasha pe shuko lyakulisha ilya kuba ifibusa fya kwa Yehova no mulandu tulingile ukubombesha ukumwishiba no kumuteemuna. (Heb. 11:6) Mu October, twalicincimushiwe ilyo twasambilile ifipande fitatu mu Ulupungu lwa kwa Kalinda ifyalelanda pa fyo abacaice bengaba no mupashi uwapusanako no wa cino calo mu mibele yabo yonse. (Kol. 3:8) Moneni ifyo twali no kupuswako ubwingi atukanasangwako kuli kulya kulongana.
4 Ibungano lyesu ilya Citungu ilya mu 1999 ilyaleti “Icebo ca Kusesema ica kwa Lesa” lyalikoseshe nga nshi ukutetekela kwesu ukwa kuti amalayo ya kwa Lesa yonse ayashilafikilishiwa yakafishiwapo. Twalicincishiwe ukutwalilila ukubila kuli bambi Icebo ca kusesema ica kwa Lesa. Nga fintu icitabo ca Abateyanishiwa ku Kupwilikisha Ubutumikishi Bwesu cilanda pe bula 72, Isukulu lya Butumikishi bwa Teokrasi lipayanya ukukanshiwa kwatwalilila ku cilonganino conse. Pa kumwenamo icine cine muli ili sukulu, tufwile ukucita umwabela ifyo batufunda. Nga tulecita ifyo batufunda, panono panono twakulawamyako ukulamuka kwesu ukwa kushimikila ubukombe bwa Bufumu ku cintubwingi na ku ng’anda ne ng’anda. Tufwaisha ukumwenamo muli uku kukansha.
5 Ukulongana kwesu ukwa Mulimo kulatupangasha ifya kulanda bwino mu butumikishi. Mu Ukulongana kwa Mulimo mwine e mo twasambilile na fintu twakulatambika impapulo ukwabula ukwimika umutengo. Bakasabankanya balamuka abaali mu filangililo tabalandile ukuti bamagazini ne mpapulo nomba twakulafipoka apa fye, balandile ukuti fileananishiwa ukwabula ukulipilisha. Balitulangilile bwino bwino fintu twingatambika na fintu twingepusha mwine ng’anda nga kuti atemwa ukusangwilako ku mulimo wa mwi sonde lyonse. Abasangwako lyonse ku kulongana balyumfwikishe ifyo imibombele yabo ikaba muli iyi mitantikile ipya no kuti Yehova akapaala uyu mulimo.—2 Kor. 9:7.
6 Pe Sambililo lya Citabo pa Cilonganino, amasambililo yesu mu citabo ca Umuntu Wakulisha Uwabalile Abako Uwa Mweo nayatulenga ukutesekesha Yesu Kristu. Natumfwikisha umwalola ukukonka Yesu. Apo ifintu pano isonde filealuka lubilo lubilo, tulecilapo ukumona ipamfya lya nshita shesu ilyo tulesambilila ifyacitike mu nshiku sha kulekelesha mu butumikishi bwa kwa Yesu pe sonde mu citabo ca Umuntu Wakulisha.
7 Tangisheniko Ukusangwa Lyonse ku Kulongana: Mu fyalo ifingi umo bamunyinefwe abalecula ku mesho, bacili nabeshiba ubucindami bwaba mu kulalongana cila mulungu. Abapya abengi nga nshi balasangwako ica kuti impendwa ilacilapo imiku ibili nelyo fye itatu pa mpendwa ya bakasabankanya. Iyi e nshila Yehova afwilamo bamunyinefwe ukwiminina aba mutima umo.—Fil. 1:27; Heb. 10:23-25.
8 Abali bonse nalimo abashalesangwako lyonse ku kulongana bafwile ukucitapo cimo no kuleka ico cibelesho. (Luk. Mil. 4:9-12) Pa kuti twingeminina abashangila, tukabila ukukoseleshanya na bamunyinefwe abakosoka pa kusangwa lyonse ku kulongana.—Rom. 1:11.