Ukutambika Icitabo ca Ukwishiba Uko Kutungulula ku Mweo wa Muyayaya
1 Twalicincimwike lintu icitabo cipya, Ukwishiba Uko Kutungulula ku Mweo wa Muyayaya, cakakwilwe! Capekanishiwa ku kwaafwa abantu ukwishiba icine mu kulungikwa kabili mu kwanguka. Mu December tuli no kukwata ishuko lyesu ilya mu nshita ilya kubalilapo ilya kutambika ici citabo mu cifulo cesu ica kubombelamo. Cinshi twingasosa ku kubalamuna ubuseko?
2 Pano palipo imipeelele iingacebusha umuntu uyo icitetekelo cakwe muli Lesa canaka:
◼ “Abantu abengi pa kukula balicetekele muli Lesa, lelo pali nomba balisango kuti icitetekelo cabo tacaba nga fintu cali. Bushe muletontonkanya ukuti cinshi cilengele? [Leka asuke.] Icitetekelo cesu muli Lesa cilakoshiwa pa kulanguluka ifipapwa fya bubumbo. [Belenga Ilumbo 19:1.] Umo uyo amafunde yakwe yatungulula ifi fintu fya mu lwelele na kabili alitupayanishisha ubutungulushi bwakatama. [Belenga Ilumbo 19:7-9.] Ifi fikomo filekomaila pa fyo cacindama ukusambilila ukufika apo twingapesha pa lwa kwa Lesa ne mifwaile yakwe. [Kupukula pa cikope caba pa mabula 4 na 5, kabili belenga amashiwi yasangwapo.] Nga mulefwaya ukumwenamo muli uku kwishiba kwaibela, kuti namushiila ici citabo pa musangulo wa K800.00.”
3 Ukwibukishako ilyashi limo ilya kubombomanika ilya nomba line, kuti pambi watila:
◼ “Mufwile mwaliumfwa pa lwa [lumbula icacitike]. Bushe mwalibala amutontonkanyapo nga ca kuti Lesa mu cituntulu alyangwako pa lwa lufyengo no kucula ifyo tuimwena fwe bene nelyo ifyo pambi tuculanako? [Leka asuke.] Baibolo ilatwebekesha ukuti Lesa alitutemwa no kuti akatwaafwa mu nshita sha kumanama.” Belenga imbali she Ilumbo 72:12-17. Kupukula icitabo pe bula 70, kabili londolola ukuti ici citabo, Ukwishiba Uko Kutungulula ku Mweo wa Muyayaya, casuka icipusho ico abantu na bantu baipusha ica kuti, Mulandu nshi Lesa asuminishisha ukucula? “Muli no kusanga icasuko ca mu Baibolo kuli ico cipusho ukuba ica kusansamusha nga nshi. Kuti natemwa ukumushiila ici citabo pa kuti mwingaibelengela cene mwe bene.”
4 Nga ca kuti wakumanya umufyashi, kuti pambi watontomesha pa lupwa:
◼ “Abafyashi abengi balasumina ukuti kwalibako amafya ayengi mu kwesha ukusungilila ubumi bwa lupwa ubwa nsansa. Cinshi mwamona ukuba e cipindami cine cine? [Leka asuke.] Ubwingi bwesu tulabombesha ukufika apo twingapesha, lelo ilingi line tulatasha imitubululo iingatwaafwa ukunonka ifya kufumamo fyawaminako. Baibolo ilapeela ukupanda amano kushaiwamina. [Belenga imbali sha Abena Kolose 3:12, 18-21.] Baibolo ilasosa ifyacilanapo pali uyu mulandu, nga fintu calondololwa mu cipandwa 15 ica ici citabo, icikwete umutwe uuleti ‘Ukukuula Ulupwa Ulucindika Lesa.’ Cipituluka mu kufunda ukwapeelwa muli Baibolo ukulanga ifya kucefyako ukukanshika kwa mu cupo ne fya kubomba ne mpika ishilolenkana na bana besu. Ndi uwashininkishe fyo muli no kuipakisha ukubelenga cene.”
5 Nga ca kuti wasalapo ukwipifya, kuti pambi waeshako ifi:
◼ “Bushe mwalitontonkanyapo pa mulandu tukotela no kufwa? Icipandwa 6 muli ici citabo cilondolola icilenga imfwa na fintu Lesa akaifumyapo. Baibolo itwebo kuti Lesa alilaya umweo wa muyayaya kuli abo abamutemwa. [Belenga Yohane 17:3.] Nga mwingatemwa ukubelenga pa lwa ici, muli no kusanga ici citabo ukuba ica kubuutusha nga nshi.”
6 Nga ca kuti tuli abaipekanya bwino, kuti pambi twaba na maka ya kubomfya ici citabo ku ‘kukupukula amalembo’ kuli bambi mu nshila iingabaletela ubuseko bukalamba!—Luka 24:32.