Pekanishisha Imibombele ya Kulembesha Bamagazini mu April

Nga fintu cilangililwe pali Kalenda wesu uwa 1996, Ica Kulya ca Cungulo ica kwa Shikulu uno mwaka cikasefiwa pa April 2. Pa kukoseleshiwa kuli aka kashita kakatama, shi bonse natukakane mu mulimo wa kulembesha bamagazini uwapimpa mu mweshi wa April onse. Mwandi ni bamagazini ba pa nshita yalinga abo tukalabomfya! Ulupungu lwa kwa Kalinda ulwa April 1 lukatonta pa lyashi lya cintubwingi ilya pe bungano lya citungu ilya mwaka wapwile ilyaleti, “Lumbanyeni Imfumu ya Muyayaya!” Ulupungu lwa kwa Kalinda ulwa April 15 lukalanda pa mutwe wa lyashi lyaibela ilya pa cintubwingi ilyaleti, “Impela ya Kupepa kwa Bufi Naipalama.” Ilyashi lyaibela ilya uno mwaka pa April 21 ilikalatila, “Ababula Akalema mu Kati ka Nkulo Iyapondama,” lilingile ukutupeela inkosho. Tukalatambika Loleni! wa May 8 uwa mutwe wa lyashi wa kuti “Lintu Takwakabeko Inkondo.”

Nga ca kuti wakumanya abantu mu mulimo wa mwi bala, bushe inshita shimo ulashimunuka ukubatambika ukulembesha bamagazini? Bamo balashimunuka, ukutontonkanya ukuti abantu te kuti bakumanishe. Nangu cibe fyo, tatulekabila ukuyumfwa muli iyo nshila, pantu nomba twalikwata imitantikile iyo abengi bengalembeseshamo bamagazini, iitwa UKULEMBESHA KWAPUMINKANA. Bushe walibala aushukilapo iyi mitantikile? Bamo baliishukila kabili ico ciletashiwa apakalamba. Nangu ni fyo, cilingile ukuba e buyo bwa umo umo uwa ifwe ukubomfya uku kupayanya mu kukumanina. Lelo cinshi caba ukulembesha kwapuminkana? Kwaba kulembesha bamagazini abo basendwa ne cimbayambaya ca Sosaite ku cifulo ca kupokelapo impapulo ica cilonganino. Ukufuma palya, bamagazini balembeshiwa balasendwa no kutwalwa ku balembesha. Kwalinakako mutengo ukucila ukulembesesha mu post office. Umusangulo ni K3,600.00 fye ku cintubwingi pa mwaka umo na K2,000.00 pa myeshi 6, ilintu ukulembesesha mu post office kwalikoso mutengo, e kuti, K16,000.00 pa mwaka umo na K8,000.00 pa myeshi 6. Ifyakonkapo e filingile ukulembwa pali slipi: (1) Adresi wa cifulo ca kupokelapo impapulo ica cilonganino na (2) cilingile ukulembwapo ukuti “club subcription.” Ilingi line lintu balebomba umulimo wa magazini uwa mu musebo, bamo balipusha bakasabankanya ukuti, ‘bushe namukwata bamagazini ba nomba line?’ E co mulandu nshi te kwesesha ukukoselesha aba musango yo ukukwata ukulembesha kwapuminkana? Ni shani pa lwa bwingi bwa ifwe fwe bakasabankanya mu cilonganino, bushe kale kale twalishukila ukulembesha kwapuminkana? Lintu tuletambika kwene ku bantu, tufwile ukulondolola ubusuma bwabamo na fintu kupokelelwa. Kwena, lintu bamagazini batendeka ukutumwa, ulingile ukushininkisha ukuti watwala bene ku balembesha mu kwangufyanya.

Ukupala kampeni wa trakiti wa Imbila ya Bufumu uwa April wapwile, April wa uno mwaka na o alingile ukuba mweshi wapulamo uwa kutambika ukulembesha bamagazini. Nomba e nshita ya kutendeka ukupekanya. Abengi bakafwaya ukulembesha nga bapainiya ba kwafwilisha. Nga ca kuti mulekabila bamagazini balundwako mu April, mulingile ukuorda. Kuti mwatantika Inshiku sha Magazini, mu kuba no uli onse ukubombako nga cingacitika—ulucelo, icungulo, na/nelyo icungulo bushiku. Shi ifwe bonse ‘natube bakacita wa cebo.’ Nga fintu casobelwe ukulosha kuli Mesia pa Ilumbo 69:9 shi na ifwe bene natube na maka ya kusosa ukuti: “Ukupimpile ŋanda yenu kwandya.”—Yako. 1:22; Yoh. 2:17.