Ukulanshanya kwa Bucibusa Kuti Kwafika pa Mutima
1 Ukulanshanya kuti kwalondololwa nga “ukulandishanya imfundo.” Ukutendeka ukulanshanya kwa bucibusa pa mutwe ukumine bambi kuti kwacebusha ubuseko bwabo kabili kuti kwatwaafwa ukubafika pa mutima no bukombe bwa Bufumu. Ukubelesha kwalangilila ukuti cilabomba bwino nga nshi ukusansha abantu mu kulanshanya kwa bucibusa kabili ukwa mutembo ukucila ukubakolobondela mu lyashi lyalepa.
2 Ifya Kutendeka Ukulanshanya kwa Bucibusa: Ukuba na maka ya kulanshanya na bambi tacipilibula ukuti tufwile ukubalondolwela ifyebo fyatantikwa na malembo. Ukulanshanya kubimbamo fye ukusansha umuntu mu kulanshanya kwesu. Ku ca kumwenako, lintu tulelanshanya muli bucibusa no mwina mupalamano wesu, takuba kulanshanya kwapampamikwa lelo mu kunakilila. Tatutontonkanya pa lwa mashiwi twalalanda mu kukonkapo lelo twankulako mu cifyalilwa ku mfundo isho alelanda. Ukukwata ubuseko bwa cine cine mu fintu alesosa nakalimo kuti kwamukoselesha ukutwalilila ukulanshanya na ifwe. E cimo cine na lintu tuleshimikila kuli bambi.
3 Imitwe pamo nga imisoka, amafya ya misepela, imilandu ya mu bwikashi, imibele ya calo, nelyo fye imiceele kuti fyabomfiwa ku kutendeka ukulanshanya kwa bucibusa. Amalyashi ayo yambukila ubumi bwa bantu mu kulungatika yalabomba bwino nga nshi mu kubimbula ubuseko bwabo. Lintu ukulanshanya kwatendeka, kuti twakwalwila ku bukombe bwa Bufumu.
4 Ukulanshanya mu kunakilila tacipilibula ukuti tatulekabila ukupekanya mu kubangilila. Kuti twapekanya. Nangu cibe fyo, tacilekabilwa ukupanga autulaini wapampamikwa nelyo ukusungila ilyashi ku mutwe, ico cingalenga ukulanshanya ukuba ukushakondenkana nelyo ukushingateulwilwa ku fintu twasanga. (Linganyeniko 1 Abena Korinti 9:20-23.) Inshila yawamisha iya kupekanishishamo yaba ya kusala umutwe we lembo umo nelyo ibili, mu kuba no buyo bwa kukomaila pali ayo malembo. Ukupituluka mu malyashi yaba mu citabo ca Ukupelulula kukaba ukwa kwaafwa muli ici.
5 Imibele Ikabilwa ku Kulanshanya kwa Bucibusa: Lintu tulelanshanya na bambi, tulingile ukuba aba cikabilila kabili abafumaluka. Ukumwentula ne mimonekele ya cimwemwe filaafwa ukulangisha iyi mibele. Twakwata ubukombe bwawamisha mu calo; bwaliba ubwa kucebusha ku bantu ba bufumacumi. Nga ca kuti bamona ukuti ubuseko bwesu muli bene bulekuntwa no kufwaisha kwafumaluka ukwa kubashimikila imbila nsuma, lyene kuti bakuntwa ukukutika.—2 Kor. 2:17.
6 Ukutendeka ukulanshanya kulingile ukuba ca kukumanya cawamisha. E ico, tulingile ukuba aba cikuuku kabili abalamuka mu kushimikila ubukombe bwa Bufumu. (Gal. 5:22; Kol. 4:6) Tukusheni ukusha umuntu umbi no kushimikwa kwa Nte sha kwa Yehova ukusuma. Muli iyi nshila, nangu cingati tatutungulwike mu kutendekelako mu kufika pa mutima wakwe, nakalimo kuti afwaya ukusambilila inshita yakonkapo lintu Nte alanshanya nankwe.
7 Ukutendeka ukulanshanya kwa bucibusa takwaba ca kufumamo ca kusoma ilyashi limo ilyalepa. Kwaba fye kubimbula ubuseko mu lyashi ilyo lingakuma umuntu. Lintu twapekanishisha libela, lyene tukaba abaipekanya ukusansha abantu mu kulanshanya kwa bucibusa. Shi natutukushe ukufika pa mitima ya abo tukumanya pa kubashimikila imbila yawamisha iyo ingasangwa, iya mapaalo ya ciyayaya aya Bufumu.—2 Pet. 3:13.