Programu Mupya uwa Bushiku bwa Kulongana Kwaibela

¹ “Beni Abasambilishiwa na Yehova” e mutwe wa programu mupya uwa bushiku bwa kulongana kwaibela uuletendeka mu September. (Yoh. 6:45) Isambilisho lya bulesa ukufuma kuli Yehova mu cine cine lilatwaafwa ukwikala ubumi bwa kwikusha. Lilalundulula muli ifwe ukutesekesha kwaswatuka ukwa bupyani bwesu ubwa ku mupashi. Ukubombesha kwesu ukwa kwaafwa bambi ukumfwa imbila nsuma kutulenga ukuba ifilundwa fyafwilisha sana ubwikashi. Ubu bushiku bwa kulongana kwaibela bukakomaila pa mapaalo ayo abasambilishiwa na Yehova baipakisha.

² Programu akacilanya ubunonshi bwe sambilisho lya bulesa no busanso bwa masambililo ya ku calo. Tukomfwikisha bwino nga nshi fintu Yehova apayanya amasomo yasumbukisha apakalamba—amasomo yashimpwa pa Cebo cakwe, Baibolo. Kukabako ukukomaila pa mbali shitatu isha kupepa isho tuipakishamo ubuseko bwa kusambilishiwa na Lesa. Mu kulundapo, imisepela ikakoseleshiwa ukupashanya ifya kumwenako fyapulamo ifya Baibolo pamo nge ca kwa Davidi na Timote no kwangwa imibombele ya ku mupashi mu bumi bwabo bonse. Icitetekelo cesu cikakoshiwa ilintu bucishinka bwa bakalamba na bo bwine bukakomailwapo. Abaipeela abapya abafikapo bakaba na maka ya kubatishiwa. Ilyo ubushiku bwa kulongana tabulafika, balingile ukwishibisha kangalila wa kutangilila pa lwa uko kufwaisha.

³ Ilyashi likalamba ilya bushiku bwa kulongana kwaibela likwete umutwe wa kuti “Ukusambilishiwa na Yehova ku Kucita Ukufwaya Kwakwe.” Likakomaila pa milandu ifwe bonse tulekabila ukutwalilila ukusambilila, ukuba abashikatala mu citetekelo, no kutwalilila ukulalunduluka. Tukacincishiwa ukupashanya Yehova pa kusambilisha bambi icine ico citungulula ku mweo wa muyayaya. Ifya kukumanya fya kukuulilila fikasanshiwamo ku kulanga fintu impapulo sha Sosaite shayafwa abengi ukusambilishiwa na Yehova. Ifintu fya kunonsha ifyo programu wa kusambilisha uwa kwa Yehova uwa mu cibulungwa conse ice sonde apwishishisha fikakomailwapo.

⁴ Shininkisheni ukuti mwapekanya ukusangwako. Koselesheni abalesekelela bonse ukusangwako. Enekeleni ukusambilishiwa ifintu fisuma ifingi kuli Kafundisha wesu Umukalamba.—Esa. 30:20.