Ukulongana Kwaibela Ukwa mu 2010
1. (a) Mitwe nshi iya kulongana kwaibela iyashimpwa pa Malembo iyalandwapo mu myaka yapita? (b) Fishinka nshi fimo fimo ifyo mwaumfwile pa kulongana kwaibela ukwapita ifyamwafwa mu butumikishi?
1 ‘Ishibeni Bwino Bwino Ifyacilapo Ukucindama,’ ‘Abakosa Ndi ngo Mukuni Umo,’ ‘Shimikisheni Icine,’ ‘Ifwe Tuli Ibumba—Yehova E Mubumfi.’ (Fil. 1:9, 10, 27; Yoh. 18:37; Esa. 64:8) Twalumbulapo fye imitwe imo imo iya kulongana kwaibela ukwapita. Bushe mulefwaisha ukusangwa ku kulongana kwaibela ukwa mu mwaka wa mulimo uwa 2010? Umutwe wa kulongana ukalati: “Inshita Iisheleko Naicepa,” kabili ufumine pali 1 Abena Korinti 7:29.
2. Kuti mwacita shani pa kuti mukalefwaya sana ukusangwa kuli uku kulongana?
2 Ilyo mwaishiba ubushiku icilonganino cenu cikalongana ukulongana kwaibela mukatampe no kulalandapo. Abafyashi bamo balafwa abana babo ukufwaisha ukusangwa ku kulongana kukalamba pa kulemba ubushiku pali kalenda ya lupwa, e lyo balalemba ne filefwaikwa ukusenda ku kulongana, kabili balaya balependa inshiku. Pa bushiku bwenu ubwa Mapepo ya Lupwa, kuti cawama nga mulepituluka na mu fishinka mwalembele pa kulongana kwaibela ukwapita. Kabili kuti mwaipekanishisha kuli uku kulongana pa kulanshanya ifyebo fyaba mu citabo ca Nonkelenimo mu Masambililo ya Isukulu lya Butumikishi Ilya Bulesa, amabula 13-16, ku kumwafwa no lupwa lwenu ‘ukubikako amano ku fyo mulekutika.’—Luka 8:18.
3. Kuti twacita shani pa kuti tumwenemo sana mu fyo tukasambilila?
3 Mulecita Ifyo Mulesambilila: Pa numa ya kulongana kukalamba abantu balitemwa ukulanda ukuti, “Awe ukulongana kwawama!” Ifyo balanda fya cine, pantu uku kulongana kwaba pa fintu ifisuma kabili ifingi nga nshi ifyo Yehova atupeela. (Amapi. 10:22) Pa kuti ifyebo fimwafwe, mufwile ukulatontonkanyapo sana no kulafibukisha. (Luka 8:15) Ilyo mulebwelelamo ku mayanda, lanshanyeni no lupwa lwenu nangu abo mule-endela na bo capamo ifyo amalyashi yacilalandapo. Landeni pa fyo mulepanga ukucita na pa fishinka ifikamwafwa mu mulimo wenu uwa kushimikila. Nga mulecite ifi ninshi ifyo mwasambilila pa kulongana kukalamba fikalamfwa na ku ntanshi.—Yako. 1:25.
4. Mulandu nshi uku kulongana kukawamina nga nshi?
4 Tulomfwa bwino nga nshi nga ca kuti twapokelela ica bupe ico tulekabila sana. Bushe tatulefwaisha ukuyaumfwa ifyo Yehova atupekanishishe pa kulongana kwaibela? Uku kulongana kukatwafwa mu mbali fye shonse. Ukwabula no kutwishika kuti twaenekela Shifwe wa ku muulu, Yehova, ukutupeela ica bupe ico tulekabila ukupitila mu kutukoselesha no kutusambilisha bwino ifya kubomba umulimo atupeela.—2 Tim. 4:2; Yako. 1:17.