Icebo ca kwa Lesa ca Maka
1. Bushe umutwe wa kulongana kwaibela ukwa mwaka wa mulimo uwa mu 2014 uleti shani?
1 Baibolo tayafuma ku bantunse abashapwililika, e ico, yalikwata amaka ya kwalula imitima yesu, no kulenga twatendeka ukulatontonkanya ukulingana ne fyo Yehova afwaya. Bushe amaka Icebo ca kwa Lesa cakwata yaba shani? Bushe kuti twabomfya shani Baibolo mu bumi bwesu? Kuti twabomfya shani Baibolo ku kwafwa bambi? Natucetekela ukuti bonse tukakoseleshiwa lwa ku mupashi ilyo tukalasambilila ifi fishinka pa kulongana kwaibela ukukabako mu mwaka wa mulimo uwa 2014. Umutwe wa uku kulongana uletila, “Icebo ca kwa Lesa ca Maka,” ukufuma pa AbaHebere 4:12.
2. Ilyo tukalalongana, bushe mepusho nshi ayo tukabikako sana amano ukumfwa amasuko?
2 Mukasange Amasuko Kuli aya Mepusho: Ilyo mukalakutika ku malyashi, mukabikeko amano ku kufwaya amasuko ku mepusho yakonkapo.
• Mulandu nshi tulingile ukucetekelela Icebo ca kwa Yehova? (Amalu. 29:4)
• Bushe kuti twacita shani pa kuti amaka Icebo ca kwa Lesa cakwata yalebomba mu bumi bwesu? (Amalu. 34:8)
• Kuti mwabomfya shani amaka yaba mu Cebo ca kwa Lesa ilyo muleshimikila? (2 Tim. 3:16, 17)
• Kuti twacita shani pa kuti tatulufiwe no kubepwa ku mano yaba mu calo ca kwa Satana? (1 Yoh. 5:19)
• Nga uli musepela, kuti watunguluka shani mu fya kwa Lesa? (Yer. 17:7)
• Kuti twaba shani abakosa ilyo tuleumfwa abanaka? (2 Kor. 12:10)
• Kuti mwacita shani pa kuti mutwalilile ukula-alula ubumi bwenu, nangu ca kuti mwalikwata ifibelesho fimo ifyabipa pa nshita ntali? (Efes. 4:23)
3. Ukulunda pa kukutika ku malyashi, finshi fimbi twingacita pa kuti tukaipakishe ukulongana kwaibela?
3 Ala mwandini tukanonkelamo nga nshi ilyo tukalakutika kuli ifi fyebo fyacindama! E lyo cimbi naco ca kuti, ukulongana kwaibela, ukulongana kwa muputule no kulongana kwa citungu, konse kulalenga twakwata ishuko lya kwishibana na bamunyinefwe na bankashi ababa mu filonganino fimbi. (Amalu. 133:1-3; 2 Kor. 6:11-13) Kanshi mukalesanga inshita ya kuba ne fibusa fya kale na kale, no kupanga ifibusa ifipya. Nga namukwata kalanda umweni pamo nga kangalila wa citungu nelyo munyinefwe ukufuma ku Bethel, kuti cawama mwayamuposha pamo no mwina mwakwe. Cine cine, kuli ifisuma ifingi ifyo tukaipakisha nga twasangwa ku kulongana kwaibela ukuleisa!