Inshila Ipya iya Kupitulukila mu Kulongana Kukalamba
Ilyo icalo ca kwa Satana cileya cilebipilako, Yehova alatukosha “ukuti tukaane ukubulapepa ne fya lunkumbwa fya pano calo no kwikala aba mano ayatuntulu no bulungami no kuipeelesha kuli bukapepa muli buno bwikashi bwa ndakai.” (Tito 2:12) Pa nshila sha kutukoseshamo isho atupeela ukupitila mu “musha wa cishinka kabili uwashilimuka” paba no kulongana kwa muputule ukwa cila mwaka e lyo no kulongana kwaibela. (Mat. 24:45) Mwandini uku kulongana kwa bumupashi kulatukosha icine cine!
Pa kutwafwa ukwibukisha no kukonka ukufunda tupokelela, inshila ipya iya kupitulukila mu malyashi ya pali uku kulongana ikabomfiwa mu mwaka wa mulimo uwa 2005. Pa mabula 5 na 6 aya cino cine ica mu kati pali ifipande ifilelanda pa fishinka fikalamba fimo fimo ifikalandwa pa kulongana kukalamba pamo pene na mepusho ya kupitulukamo aya kulongana kumo na kumo. Ifilonganino fikalanshanya ifi fyebo mu Ukulongana kwa Mulimo ilyo fye bashilaya ku kulongana kukalamba ne lyo babwela. Uku kulanshanya kwakulacitwa shani?
Ilyo kwashala umulungu umo nelyo ibili ukuti icilonganino ciye ku kulongana kwa muputule, ilyashi lya maminiti 10 ukufuma pa cipande cileti “Ukulongana kwa Muputule Ukupya” likalandwa mu Ukulongana kwa Mulimo ku kubalamuna insala ya ku mupashi iya kufwaisha ukukutika ku malyashi ya mu kulongana kukalamba. Kalanda akalanda na pa mepusho ya kupitulukamo no kukoselesha bonse ukulemba ifyebo pa kupekanishisha ukupitulukamo ukukabako pa numa ya milungu inono ukutula apo mwabwelele ku kulongana.
Ilyo papita fye imilungu inono pa numa ya kulongana kukalamba, ukupitulukamo ukwa maminiti 15 ku kulanshanya ifishinka fikalamba ifya pa bushiku bwa kubalilapo ubwa kulongana kwa muputule kufwile ukubako mu Ukulongana kwa Mulimo. E lyo umulungu ukakonkapo, kwakulaba ilyashi na limbi ilya maminiti 15 ku kupituluka mu fishinka fya pa bushiku bwalenga shibili ubwa kulongana kwa muputule. Amepusho ya kupitulukamo ayali muli cino cipande ca mu kati e yafwile ukubomfiwa muli aya malyashi ya kulanshanya. Uku kulanshanya kufwile ukukomaila sana pa fyo ifyebo fingabomfiwa. Baeluda kuti bapekanya ukuti amalyashi yamo yamo mu Ukulongana kwa Mulimo yaipifiwa, nangu ukukanayalanda fye, nelyo ukuyatwala mu mulungu umbi. Ukucite fi kukalenga bakakwate inshita ya kupituluka mu kulongana kukalamba.
E fyo cakulaba na ku kulongana kwaibela, lelo kwena kwakulaba fye ilyashi limo ilya maminiti 15 ku kupituluka mu kulongana kwaibela konse. Kuti cawama ifwe bonse ukusunga cino ica mu kati pa kuti tukesecibomfya pa kupituluka mu kufunda kushaiwamina uko Yehova apeela.—Esa. 48:17, 18.