Umukululo wa Fipusho

◼ Lintu icilonganino caipushiwa ukwafwilisha mu kutantika icililo, ifipusho fyakonkapo nakalimo kuti fyaipushiwa:

Ni ani alingile ukupeela ilyashi lya cililo? Balupwa e balingile ukupingula pa lwa ici. Nakalimo kuti basala munyina uuli onse uwabatishiwa uwaiminina bwino. Nga ca kuti ibumba lya baeluda lyaipushiwa ukupayanya kalanda, ilingi line basala eluda wafikapo ukulanda ilyashi lyashimpwa pali autulaini wa Sosaite. Nangu cingati tatwingafika mu fyacishamo fya kulalumbanya uufwile, kuti caba icalinga ukulondolola imibele ya ca kumwenako iyo alangishe.

Bushe Iŋanda ya Bufumu kuti yabomfiwa? Kuti yabomfiwa nga ca kuti ibumba lya baeluda lyasuminisha kabili nga ca kuti ico tacipumfyenye ukulongana kwatantikwa ukwa lyonse. Iŋanda ya Bufumu kuti yabomfiwa nga ca kuti uufwile aleshimikwa bwino kabili aali wa mu cilonganino nelyo umwana munono uwa mufyashi waba mu cilonganino. Nga ca kuti umuntu alishibikwe bubi bubi ku cintubwingi ngo wabelesha imyendele ishili ya Bwina Kristu, nelyo nga ca kuti kuliko ifintu fimbi ifyo fingalenga icilonganino ukukanashimikwa bwino, baeluda kuti bapingulapo ukukanabomfya Iŋanda ya Bufumu.—Moneni icitabo ca Ubutumikishi Bwesu, amabula 62-3.

Mu cinkumbawile, Amayanda ya Bufumu tayabomfiwa ku fililo fya bashatetekela. Napamo kuti calangulukwapo ukubomfya Iŋanda ya Bufumu nga ca kuti balupwa bashala balebishanya ne cilonganino mu kucincila nga bakasabankanya babatishiwa, uufwile nga alishibikwe kuli bakasabankanya bafulilako mu cilonganino ukuti alikwete imibele isuma ku cine no kushimikwa kusuma ukwa myendele yalungama mu bwikashi, kabili takuli imyata ya ku calo iyasanshiwa muli programu.

Lintu balesuminisha ukubomfya Iŋanda ya Bufumu, baeluda bakalanguluka nga ca kuti caliba mwata ukwenekela ukuleta imbokoshi ku cililo. Nga ca kuti caliba mwata, nalimo kuti basuminisha ukuti bailete mu Ŋanda ya Bufumu.

Ni shani pa lwa fililo fya bantu ba ku calo? Nga ca kuti uufwile aleshimikwa bwino mu bwikashi, munyina nakalimo kuti alanda ilyashi lya Baibolo ilya kusansamusha pa ŋanda ya cililo nelyo ku nshishi. Icilonganino cikakaana ukutantika icililo ca muntu uwaishibikilwe ku myendele ya bucisenene, iishili ya mwi funde nelyo untu imibele yakwe yapusene nga nshi ne fishinte fya Baibolo. Ukwabula ukutwishika munyina tafwile ukubombela pamo na shimapepo mu kutungulula amapepo ya kukumbinkanya ifisumino nelyo mu cililo icili conse iciletungululwa ne calici lya Babele Mukalamba.

Ni shani nga ca kuti uufwile alitamfiwe? Mu cinkumbawile icilonganino tacakengilemo, ne Ŋanda ya Bufumu tayakabomfiwe. Nga ca kuti umuntu mu kushininkisha alelanga ukulapila kabili alelangisha ukuti alefwaisha ukuti abweshiwe, kampingu wa kwa munyina nakalimo kuti amusuminisha ukulanda ilyashi lya Baibolo pa ŋanda ya cililo nelyo ku nshishi, ukushimikila ku bashatetekela no kusansamusha balupwa. Nangu cibe fyo, ilyo ashilapingulapo ici, kuti caba ica mano kuli munyina ukwipusha ibumba lya baeluda no kutontonkanya pa fintu bengatubulula. Nga ni mu mibele intu cishingaba ica mano kuli uyo munyina ukwingilamo, nalimo kuti caba icalinga kuli munyina uuli ni lupwa wa muntu ufwile ukulanda ilyashi lya kusansamusha balupwa.

Ifya kutungulula fyalundwako kuti fyasangwa mu Ulupungu lwa kwa Kalinda ulwa October 15, 1990, amabula 30-1; March 15, 1982, ibula 31; March 15, 1980, amabula 5-7 (iciNgeleshi); June 1, 1978, amabula 5-8 (iciNgeleshi); December 1, 1977; September 1, 1970, amabula 407-8; na Loleni! wa September 8, 1990, amabula 26-7 no wa March 22, 1977, amabula 12-15 (iciNgeleshi).