Ukulongana Kulacincimusha ku Kubombe Milimo Isuma
1 Imbali shakatama shibili isha kupepa kwesu shaba kusangwa ku kulongana kwa cilonganino no kubombako mu mulimo wa mwi bala. Ifi fibili fyendela pamo. Cimo cilasonga icibiye. Ukulongana kwa Bwina Kristu kulacincimusha ku kubombe milimo isuma, umulimo wawamisha ukuba wa kushimikila Ubufumu no kupanga abasambi. (Heb. 10:24) Nga ca kuti twaleka ukusangwa ku kulongana, tuli no kuleka ukushimikila mu kwangufyanya pa mulandu wa kuti tatwakacincimushiwe ku kucita ifyo.
2 Pa kulongana kwa cila mulungu, tulapokelela amakambisho ya ku mupashi ayapekanishiwa ku kutukoselesha ukushimikila. Lyonse tulacinkulwako ukuti shino ni nshita she pamfya ukushimikila ubukombe bupeela ubumi ubwa Baibolo kuli bambi. Tulakoseleshiwa no kukoshiwa ukutwalilila mu mulimo wa kushimikila. (Mat. 24:13, 14) Pa kushukila inshita ya kwasukapo pa kulongana, tulabeleshanya nga nshi no kulumbulula icitetekelo cesu kuli bambi. (Heb. 10:23) Pa kulembesha mwi Isukulu lya Butumikishi bwa Teokrasi, tulakanshiwa ukuba abatumikishi bawaminako no kuwamyako mu kulamuka kwesu ukwa kusambilisha.—2 Tim. 4:2.
3 Fintu Ukulongana kwa Mulimo Kutucincisha ku Kushimikila: Ifwe bonse tulakoseleshiwa ukubelengela libela mu fyebo fya mu Ubutumikishi Bwesu Ubwa Bufumu. Ifi fyebo lyene filalambatikwa mu mintontonkanya yesu ilyo tulesangwa ku Kulongana kwa Mulimo no kumona inshila sha kulandilamo ishilelangililwa pa cisebele. Lintu tuli mu mulimo wa mwi bala, kuti twatontonkanya pa fyebo fya mu Ubutumikishi Bwesu Ubwa Bufumu, ukwibukisha inshila sha kulandilamo ishalangililwe, na muli fyo ukushimikila bwino nga nshi. Ifi e fintu bakasabankanya abengi bacita.
4 Pamo nge nshila ya kubomfeshamo ifyebo fya mu Kulongana kwa Mulimo, bamo balapangana na bambi ukubombela pamo mu butumikishi. Bakasabankanya balebukisha bwino ifishinka fya mwi bala kabili balacincimushiwa ukwesha fyene pantu uku kulongana kwalibakoselesha ukubombako mu mulimo wa kushimikila cila mulungu.
5 Takuli ico twingapyanika pa kulongana kwesu ukwa Bwina Kristu, uko tulongana na bakapepa banensu no kucincimushiwa ku kubombe milimo isuma. Pa kuti ubutumikishi bwesu butunguluke, tufwile ukulasangwa ku kulongana kwa cilonganino lyonse. Shi natuletasha uku kupayanya kwawamisha ukufuma kuli Yehova ukupitila mu ‘kukanaleka ukulongana.’—Heb. 10:25.