Ukutandalilwa Kwingaleta Ipaalo
1 Sakeo alisekelele pa kupokelela Yesu ngo mweni mu mwakwe. Kabili fintu ico caletele ipaalo!—Luka 19:2-9.
2 Ilelo, pamo ngo Mutwe wa cilonganino, Yesu Kristu atungulula baeluda mu ‘kucema umukuni wa kwa Lesa.’ (1 Pet. 5:2, 3; Yoh. 21:15-17) Ukulunda pa kusambilisha ku kulongana no kutangilila mu mulimo wa mwi bala, bakangalila ba cilonganino mu kutemwa balaafwa umo umo uwa mu cilonganino. E co, mu nshita mu nshita, kuti mwaenekela ukumucema ngo muntu umo umo kuli baeluda, nampo ni ku mwenu, pa Ng’anda ya Bufumu, ilyo mulebomba na bo mu mulimo wa mwi bala, nelyo pa nshita shimbi. Bushe mufwile ukutiina nga baeluda bamutandalila? Iyo. Ukumutandalila takupilibula ukuti namupelebela mumo. Cinshi lyene caba imifwaile ya kucema?
3 Paulo asosele ukuti alefwaya ukutandalila bamunyina ‘ku kumona ifyo baba.’ (Imil. 15:36) Pamo nga bacemi bakwata ukutemwa, baeluda balyangwako sana pa lwa fyo ubumi bwenu buli. Bafwaya ukumwafwilisha lwa ku mupashi ku kuleka mukuulililwe. Yehova, Kacema wesu uwakwato kutemwa afwaya ifwe bonse ukusakamanwa muli uyu musango.—Esek. 34:11.
4 Mulesekelela Lintu Baeluda Bamutandalila: Ubuyo bwa kwa Paulo lintu aletandalila bamunyina bwali bwa ‘kubapeelako ica bupe ica bumupashi ku kubekasha; e kutila, asansamushiwe pamo na bene.’ (Rom. 1:11, 12) Muli shino nshiku sha kulekelesha ishayafya, ifwe bonse tulakabila ukukoseleshiwa lwa ku mupashi kabili tukabila ubwafwilisho ku kutwalilila ukuba abashangila mu citetekelo. Ukwankulako kwenu ukusuma lintu bamutandalila ku kumucema ukwabulo kutwishika kukaba kukoseleshanya.
5 Muletasha pa bunonshi ubwingi ubufuma mu mulimo wa bucemi uwa baeluda. Nga ca kuti pali icilemusakamika, muleibukisha ukuti baeluda babelako ku kwaafwa mu cilonganino. Mwilashingashinga ukulanshanya na bene pa fili fyonse ifingaambukila bumupashi bwenu. Muletasha pali uku kutantika kwa kwa Yehova ukwabamo ukutemwa, kabili mulesekelela mu mapaalo yesako pa mulandu wa uku kutandalilwa.