Umukululo wa Fipusho

◼ Bushe cicili icalinga ukutungulula isambililo lya Baibolo kuli munyina nelyo nkashi uwanaka lintu umo uwa muli Komiti wa Mulimo uwa Cilonganino atila ico cicitwe?

Baeluda balikwato mulimo wa kucema icilonganino, ukusanshako bonse abanaka. Batandalila aba musango yo no kumona ifyo bengafwiwa. Nga nacilinga, ici kuti casanshamo ukutungulula isambililo lya Baibolo ku banaka. Icitabo ca Abateyanishiwa ku Kupwilikisha Ubutumikishi Bwesu, pe bula 103, cilondolola ukuti Komiti wa Mulimo uwa Cilonganino kuti amona abengafwiwa muli uyu musango.

Kangalila wa mulimo e usala uwingatungulula bwino isambililo, imitwe iilingile ukusambililwa, ne citabo icingabomba bwino. Napamo uwalemutungulula isambililo nelyo umukaya wakwe uo acindika e wingamwafwilisha bwino. Nkashi uwa kampuka kabili uwakosoka kuti alombwa ukwafwilisha nkashi uwanaka. Te mulandu nangu katungulula uusalilwe tabombele pamo na kasabankanya umbi. Kasabankanya uuletungulula isambililo kuti apende nshita, ifipempu fya kubwelelamo, ne sambililo.—Moneni Ubutumikishi Bwesu Ubwa Bufumu ubwa November 1987, pa mabula 1-2.

Apantu umusambi alibatishiwa, isambililo talilingile ukutungululwa pa nshita ntali. Ili sambililo lilingile ukwafwa uwanaka ukutendeko kulongana no kuba kasabankanya wa lyonse uwa mbila nsuma. Kangalila wa mulimo akalamono kulunduluka kwa masambililo ya musango yo. Ubu bwafwilisho bwa kutemwa bukalenga aba bamunyina na bankashi ukubomba umulimo wabo kuli Yehova no kuba “abalimbwa kabili abakuulwa” mu kutemwa.—Efes. 3:17; Gal. 6:5.