Umukululo wa Fipusho

◼ Kuti mwayafwa shani uwaleka ukushimikila pa nshita ntali ukuti afikepo na kabili ukuba kasabankanya wa mbila nsuma?

Lintu uwaleka ukushimikila alangilila ukuti cine cine alefwaisha ukubombela Yehova, cilatuletela insansa. (Luka 15:4-6) Napamo uyo muntu alekele pa mulandu wa kukaanya nelyo alekele amafya ya bwikashi ukumusendela inshita ye sambililo lya pa lwakwe, iya kulongana, ne ya kubomba mu butumikishi bwa mwi bala. Kuti mwamwafwa shani bwino pa kuti alunduluke lwa ku mupashi?

Ifwe bonse tufwile ukuitendekelako ukumulanga ukutemwa kwine kwine ukwa Bwina Kristu. Baeluda tabakekate na ku cani ukumona ifyo alekabila lwa ku mupashi. (Yako. 5:14, 15) Nga ca kuti alekele ukubomba pa nshita fye iinono, kasabankanya uwabelesha e wingaafwa ku kupuupuutula uyo muntu ku mibombele ya mulimo wa mwi bala. Lelo, nga ca kutila uwaleka ukushimikila ni kale alekele ukubishanya ne cilonganino, napamo kuti akabila ukwafwiwa sana. Pa kukuula icitetekelo no kukusha ukutesekesha, Isambililo lya Baibolo mu lupapulo lwalinga kuti lyatendekwa. Nga cabe fyo, kangalila wa mulimo akatantika kasabankanya wafikapo ukuti akalemutungulula isambililo. (Heb. 5:12-14; moneni Umukululo wa Cipusho mu Ubutumikishi Bwesu ubwa November 1998.) Nga ca kuti mwalishibako umo uwingakabila ubo bwafwilisho, ebeni kangalila wa mulimo uwa mu cilonganino cenu.

Ilyo mushilalaalika uwaleka ukushimikila pa nshita ntali ukutendeka ukushimikila na kabili, catashiwa ukuti baeluda babili bakumane na o ku kumona nga nafikapo ukuba kasabankanya wa Bufumu. Bakakonka ukutantika nga kulya bakonka ilyo balepitulukamo na bapya abalefwaya ukuba bakasabankanya ba mbila nsuma. (Moneni Ulupungu lwa kwa Kalinda ulwa November 15, 1988, ibula 17.) Uwaleka ukushimikila afwile aba no kufwaisha kwa kulashimikilako bambi imbila nsuma. Afwile na kabili ukukumanisha ififwaikwa fya kutendekelako ifyatantikwa pa mabula 98-9 aya mu citabo ca Abateyanishiwa no kulasangwa lyonse ku kulongana kwa cilonganino.

Nga ca kuti alekonka ukutantika kwa fintu fya ku mupashi, kukamwafwa sana ukukosha no kusungilila bucibusa bwakwe na Yehova no kutwalilila ukwenda pa nshila itwala ku mweo wa muyayaya. (Mat. 7:14; Heb. 10:23-25) Ukuibikilishako mu “kucincila konse” no kulundulula imibele ya Bwina Kristu iyakosa kukamutalusha ku kukanaba umusambi wa Bwina Kristu ‘uushipilikita, kabili uushitwale fisabo.’—2 Pet. 1:5-8.