Mwilalaba Abanaka
1. Mulandu nshi tulingile ukubombesha ukwafwa abanaka?
1 Bushe mwalishibako uwa bwananyina uwanaka? Nalimo alileka ukwampana ne cilonganino kabili alisensenunwa. Nakalimo mwamusangile ilyo mwaleshimikila ku ng’anda ne ng’anda. Tulingile ukulaibukisha ukuti uyo muntu acili ni munyinefwe. Tulefwaya eshibe ukuti twalimutemwa kabili tulefwaya tumwafwe ukubwela mu cilonganino kabili ku ‘mucemi kabili kangalila wa myeo yesu.’—1 Pet. 2:25.
2. Kuti twakoselesha shani uwanaka?
2 Lekeni Beshibe Ukuti Mwalibatemwa: Nga twalanda no wanaka pa foni pa nshita iinono nelyo twamutandalila, nalimo kuti aishiba ukuti tatwamulaba. Finshi twingalanda nankwe? Kuti twakoselesha uyo muntu nga ca kuti twalanda fye ukutila twacilamutontonkanyapo. Landeni ifyebo ifisuma kabili ifya kukoselesha. (Fil. 4:8) Nalimo kuti twalanda icishinka cimo ico twatemenwe mu kulongana kwa nomba line. Na kabili kuti twamulaalika ku kulongana kwa cilonganino ukukonkelepo nelyo ku kulongana kukalamba kabili kuti twamweba atuti tukamusungila ne cipuna nangu tukamusendako muli motoka nelyo tukamufwaila indalama sha kwendela.
3. Bushe nkashi umo apuupuutwike shani?
3 Nkashi uwalekele ukubomba imilimo ya Bwina Kristu ukucila pa myaka 20, bamusangile mu cifulo ca kubombelamo. Nangu ca kutila alikene isambililo lya Baibolo, nkashi uwamusangile alemutandalila lyonse, no kumushila bamagazini ba nomba line. Pa numa ya kulongana kwa citungu, kasabankanya ashimikile nkashi uwalekele ukubomba ifishinka fimo fimo ifyali ku kulongana kwa citungu, kabili mu kuya kwa nshita alipuupuutwike.
4. Bushe tulingile ukumona shani umuntu uwatendeka ukulaisa ku kulongana na kabili?
4 Ilyo Umo Abwela: Bushe tufwile ukumona shani munyina uwalekele ukubomba nga atendeka ukwisa ku kulongana? Cisuma, bushe Yesu apokelele shani abasambi bakwe ilyo inshita imo balekele ukumukonka? Abetile ukutila “bamunyinane” kabili alibacetekele. Na kabili alibapeele no mulimo wacindama. (Mat. 28:10, 18, 19) Pa shipita fye inshiku ishinono, abasambi bakwe balicincile ukubila imbila nsuma “ukwabulo kuleka.”—Imil. 5:42.
5. Landeni inshita twingalanda na baeluda pa muntu uwanaka.
5 Ilyo tushilatendeka ukusambilila Baibolo no muntu uwanaka nangu ilyo tushilaeba munyina uwalekele ukubomba pa nshita iitali ukuya nankwe mu mulimo wa kushimikila, tulingile intanshi ukulanda na baeluda. Nga ca kuti ilyo tuleshimikila mu cifulo cesu twasanga kasabankanya uwanaka, tulingile ukweba baeluda pa kuti bapekanya umo alingile ukumwafwa.
6. Ni nsansa nshi twingakwata nga twayafwa abanaka?
6 Nga fintu Baibolo ilanda, ni balya fye ababutuka ukufika ku mpela e bakapusuka. (Mat. 24:13) E ico, mwilalaba abaipununa nangu abasensenunwa. Nga ca kuti mu mutima nteka twaba ne citemwiko ico Yehova akwata ukupitila mu kubalanga ukuti twalibatemwa, kuti twaimwena insansa shaba mu kumona abo bantu batendeka ukupepa Lesa pamo na ifwe.—Luka 15:4-10.