Tufwile Ukuyako Libili Libili
1 Bushe mwalisumine apo pene fye ilyo umo amushimikile mbila nsuma umuku wa kubalilapo? Nga te ifyo, mufwile mulatasha pantu Inte sha kwa Yehova tashalekele ukwisako libili libili ukufikila lintu mwasukile mwasumina ukusambilila Baibolo. Cisuma ukwibukishe co ilyo mulebomba libili libili mu cifulo cenu ica kubombelamo.
2 Imikalile ya bantu ilealukaaluka. Balakumanya amafya yambi nelyo imibele imbi, balomfwa intulubundi sha mu bwikashi nelyo mwi sonde, balacula mu fya ndalama, balalwalika nelyo ukufwilwa. Ifi fyonse kuti fyalenga bafwaye ukwishiba icilenga aya macushi. Tufwile ukwishibe milandu iisakamika abantu kabili lyene ukubashimikilo bukombe bwa kusansamusha.
3 Mulimo wa Kupususha Abantu: Tontonkanyeni pa balepususha abantu apacitike ubusanso. Abalefwaya mu ncende umulesangwa fye abanono abapuswike tabatompoka pa mulandu wa kuti abanabo abali kumbi balesanga abengi abapuswike. Umulimo wesu uwa kupususha abantu taulapwa. Cila mwaka, abengi abafwaya ukupusuka “ubucushi bukalamba” balesangwa.—Ukus. 7:9, 14.
4 “Umuntu onse uwalilila kwi shina lya kwa [Yehova, NW] akapusuka.” (Rom. 10:13-15) Aya mashiwi yalingile ukutukunta ukuba no mukoosha ukushimikila. Ukutule lyo icifulo cesu catendeke ukubombelwamo, abana balikula ica kuti nomba balaitontonkanishisha pa fyo bakekala ku ntanshi na pa lwa mifwaile ya bumi. Tatwaishiba abakakutika kwi pele pele. (Luk. Mil. 11:6) Abengi abalekaanya kale balipokelela icine. Umulimo wesu te wa kupingula abantu, lelo wa kutwalilila ukubalenga bomfwe pa kuti bengapusushiwa ukufuma muli cino calo cikote. Nga fintu abasambi ba kwa Yesu aba mu kubangilila bacitile, tufwile ‘ukuya’ ku bantu no kutukuta ukubalenga ukutemwa ubukombe bwa Bufumu.—Mat. 10:6, 7.
5 Apantu tucili natukwata inshita ya kushimikila, cilangilila inkumbu sha kwa Yehova. (2 Pet. 3:9) Ilintu tuleleka bambi ukumfwa ubukombe libili libili, tulangisha ukutemwa kwa kwa Lesa, kabili emo tumulumbanishisha.