Amaawala Yalefwaikwa Nomba Kuli Bapainiya

¹ Bonse tulatasha ukuba na bapainiya ba nshita yonse na ba kwafwilisha ababombesha mu cilonganino. Nelyo fye mu fifulo umo incende ya kushimikilamo yaba inono, kabili kulaba ukubombelamo libili libili, bapainiya baba ica kumwenako cisuma ukupitila mu kupimpa kwabo mu mulimo wa Bufumu. Balikoselesha bakasabankanya bonse ukuba abapamfiwa mu kusapika ‘abasontelwa ku mweo.’—Imil. 13:48.

² Sosaite naibukila amafya yalefulilako yantu bapainiya balekumanya, maka maka ukulosha ku kusanga incito ya ku mubili iya kuti ilebashilako inshita kabili balesangilamo ne ndalama sha kushitamo ifikabilwa mu mikalile pa kuti bengatwalilila ukubomba umulimo wa nshita yonse. Ubwafya bwa kusanga indalama ubuli mu fyalo ifingi pali ndakai bwalilesha abengi ukutendeka umulimo wa bupainiya, nangu line balafwaisha nga nshi ukubombako. Mu myeshi ya nomba line, iyi milandu ne milandu imbi nailangulukwapo bwino bwino.

³ Kanshi pa mulandu wa aya mafya, Sosaite naicefyako amaawala yafwaikwa kuli bapainiya ba nshita yonse na ba kwafwilisha. Ukutendeka mu January 1999, amaawala yakalafwaikwa kuli bapainiya ba nshita yonse ni 70 cila mweshi, e kutila amaawala 840 pa mwaka. Amaawala yakalafwaikwa kuli bapainiya ba kwafwilisha ni 50. Takuli kuteuluka ku maawala ya bapainiya baibela na bamishonari, pantu Sosaite ilabafwako ukusakamana ifya ku mubili ifikabilwa sana. Kanshi kuti bapoosesha amano ku mulimo wa kushimikila no kupanga abasambi.

⁴ Tulesubila uku kuteuluka kwa maawala yafwaikwa kuli no kulenga bapainiya abengi ukwikatisha ili shuko lya mulimo ilyaumo mutengo. Kabili kukalenga na bakasabankanya bambi abengi ukutendeka bupainiya bwa nshita yonse no bwa kwafwilisha. Fintu ici cikaba ipaalo kuli bonse mu cilonganino!