Bupainiya E Kubomfya Bwino Inshita Yesu!

¹ Nkashi umo lintu alekutika ku lyashi lyalandile eluda kabili painiya pa kulongana kwa muputule ilyaleti “Ukutwalilila Mu Butumikishi bwa Bupainiya,” atontonkenye ati: ‘Naliba ne fya kucite fingi kale! Bushe cine cine kuti cawama nga natendeka bupainiya pali ino nshita?’ Pali uku kwine kulongana pali munyina wacaice uwaletontonkanya ati, ‘Bushe afumya kwi inshita ya kubomba bupainiya? Ine nshili eluda, lelo kale kale nalikwata ifya kucita ifingi!’

² Lintu eluda atwalilile ukulondolola amapaalo yaba muli bupainiya, aipwishe bapainiya bafulilako aba muli uyo muputule na bo bashimike ifyo bateuluka pa kuti bengabomba bupainiya na fintu Yehova apaalile ukubombesha kwabo apakalamba. Umo pali aba aali cilema, umbi akwete umwina mwakwe uushasumina, umbi na o ali naleka incito ya ku mubili lelo alekumanisha ukusanga umwa kuliila. Pa kumfwa ukuti Yehova alyafwile aba bapainiya ukukumanisha, uyu munyina na nkashi mwi bumba batendeke ukupimununa amatontonkanyo yabo ne mibele intu balimo. Tulemulaalika ukucita cimo cine, maka maka apo amaawala yakabilwa kuli bapainiya nayacefiwako ica kuti bakasabankanya ba mbila nsuma abengi te kuti bafilwe kubomba.

³ Twalishiba ukuti Yehova e Kabumba kabili Mulopwe wa Kubumbwa konse no kuti e watupeela ubumi. (Dan. 4:17; Imil. 17:28) Tatutwishika ukuti Yehova alebomfya ukuteyanya kumo fye. Twalishuka ukulabombela pamo no ku kuteyanya muli bucishinka, ukutungilila “umusha wa cishinka kabili uwashilimuka” mu kushimikilo Bufumu ilyo impela ishilaisa. (Mat. 24:45; 25:40; 1 Pet. 2:9) Apo nomba natutantalila nga nshi mu “nshiku sha kulekelesha,” twalishiba ukuti inshita isheleko iya kuti tushimikile ileya ilepwa. (2 Tim. 3:1) Lubali lumbi, tulingile ukupayanishisha indupwa shesu lwa ku mubili. (1 Tim. 5:8) Indalama abantu bafola nomba tashilekumanisha ukushita ifikabilwa nga fintu cali kale. Nalimo ubutuntulu bwesu tabuli nga fintu bwali kale. Kabili ukulanda fye icishinka, tulafwaya ukushako inshita inono no kuipakisha ukukokoloka. (Luk. Mil. 3:12, 13) E co pambi kuti twatwishika nga ca kuti cine cine cili fye bwino ukubombako bupainiya ubo batulaalike ukubombako.

⁴ Cili kuli ifwe ukupimununa bwino bwino imibele tulimo ukumona nga twingabomba bupainiya. (Rom. 14:12; Gal. 6:5) Ca kukoselesha ukumona impendwa iikalamba iya babombeleko bupainiya ubo batulaalike ukubombako. Te mulandu ne fya kutitikisha na mafya muli shino nshiku sha kulekelesha, lipoti wa mulimo uwasabankanishiwa muli 1999 Yearbook alelangilila ukuti abantu ba kwa Yehova mupepi na 700,000 mwi sonde lyonse baletwalilila ukubombesha muli bupainiya. Te mulandu no kupita mu mafya ya fya ndalama, ukubulisha imyendele, ukulwalilila, nelyo amafya yambi ilyo balebomba, aba bamunyina ne nkashi tabaleleka ukucite cisuma, kabili pali ici tulebatasha. (Gal. 6:9) Balisumina ukwesha Yehova ukulingana ne fyo abalaalika ukumwesha. (Mal. 3:10) Balishiba ukuti nga babomba bupainiya ninshi babomfya bwino nga nshi inshita yabo iinono ne fyuma fyabo kabili balamono kuti Yehova cine cine alibapaala pa kuteuluka konse uko bateuluka pa kuti batendeke no kutwalilila muli bupainiya.

⁵ Bapainiya Balepaalwa: Nkashi umo mu calo ca Cameroon uuli no mwana umwanakashi umunono alondolola ati: “Ukutula apo umwana wandi afyalilwa twaleya nankwe lyonse mu butumikishi. Na lintu ashilasambilila kwenda, nalemupaapa mu numa. Lintu nali mu butumikishi ulucelo lumo, napaasukiile apo bashitisha ifintu mu mbali ya musebo. Umwana wandi afumishe bamagazini mu cola candi no kufuma apo nali. Aile aletankila ukufika ku baleshitisha lwa mupepi. Nangu ca kuti talandile ifingi, alengele umwanakashi umo ukukutikisha kabili amutambike magazini. Uyu mwanakashi alisungwike nga nshi ukumona umwana umunono nga nshi alebombako uyu mulimo. Apo pene fye alipokeleko magazini no kusumina ukulatungululwa isambililo lya Baibolo ilya mu ng’anda!”

⁶ Ilyo kwali ubwite bwa kuti bapainiya bafulilako balefwaikwa, eluda umo muno Zambia uwakwata ulupwa kabili uubomba incito ya ku mubili apingwilepo ukubomba bupainiya bwa kwafwilisha nangu ca kuti ali uwapamfiwa ku fingi. Afwaile ukuti icilonganino no lupwa lwakwe bengasambililako. Limo limo, aleimika motoka wakwe mu mbali ya musebo no kutendeka ukulisha tepu uwa Icaba Inkaama ku Nsansa sha Lupwa uwa mu ciNgeleshi pa cilimba no kwita abapita nshila ukwisakutika ku fyalebelengwa mu kupongomoka. Muli iyi nshila, alishalike ifitabo fya Nsansa sha Lupwa 16 na Ukwishiba 13, kabili alitendeke amasambililo ya Baibolo yabili.

⁷ Nangu fye ni mu calo twapalamina na co ica Zimbabwe ukupimpa kusuma ukwa bupainiya kwalimoneke. Mu April 1998, icilonganino cimo icakwata bakasabankanya 117 cakwete ababombele bupainiya bwa kwafwilisha 70 na bapainiya ba nshita yonse 9. Icilonganino na cimbi icakwata bakasabankanya 94 cakwete ababombele bupainiya bwa kwafwilisha 58. Cimbi na co, icakwata bakasabankanya 126, cashimika ukuti 58 bapingwilepo ukubomba bupainiya bwa kwafwilisha pamo na bapainiya ba nshita yonse 4. Umwaka wa mulimo uwapwa wali uwaibela nga nshi mu Zimbabwe. Nangu ca kuti bamunyina kulya balipamfiwe nga nshi ne fya lupwa, imilimo ya cilonganino, no bukuule bwa maofeshi ya Sosaite, balemenene ku kubomfya inshita yabo bwino mu butumikishi.

⁸ Bapainiya balishiba ukuti te maka yabo yabalenga ukutendeka bupainiya no kutwalilila muli bwene. Balaimwena abene no kusumina ukuti conse cintu bengacita bacitila “ku maka ayo Lesa apeela.” (1 Pet. 4:11) Icibaafwa ukutwalilila mu butumikishi cila bushiku citetekelo cabo. Mu cifulo ca kulafwaya ukwikala bwino mu bwanalale, bapainiya ababomba bwino balishiba ukuti “ukupilikita ukwingi” kulakabilwa pa kuti umo atwalilile, lelo balapokelela amapaalo ayengi mu kucite fyo.—1 Tes. 2:2.

⁹ Ica Kumwenako ca kwa Paulo Cawaminwa Ukupashanya: Baibolo ilondolola imilimo Paulo abombele mu butumikishi no kwaafwa kusuma ayafwile abantu abashaifulila. Lelo, uyu Paulo alikwete ifya kucita ifingi nga nshi. Ashipikishe ukupakaswa na mafya ya ku mubili pa kuti fye ashimikile imbila nsuma no kukoselesha ifilonganino. Kabili aaleshipikisha na mu kulwalilila kwatapata. (2 Kor. 11:21-29; 12:7-10) Apampamine pa kubomfya inshita yakwe bwino. Alisumine ukuti Yehova e walemwafwa ukubomba imilimo yonse intu abombele. (Fil. 4:13) Tapali nangu umo pa bantu Paulo ayafwile uwingasoso kuti aonawile fye inshita na maka yakwe mu mulimo wa kwa Yehova nelyo ukuti nga alicitileko fimbi ifyalondoloka. Pantu ne fwe bene tucili tulemwenamo ilelo mu fyo Paulo abomfeshe inshita yakwe bwino! Mwandi tulatasha ukufunda kwakwe ukwapuutwamo ukutwaafwilisha ukwishiba ifyacindama muli shino nshiku shayafya pa kuti tutwalilile mu cine!

¹⁰ Nomba ‘inshita isheleko iya kuti tushimikile imbila nsuma naipipa’ ukucila ifyo yali ilyo twatendeke. (1 Kor. 7:29; Mat. 24:14) E co, nacilinga ukuipusha atuti, ‘Bushe nga ca kuti nafwa mailo ubushiku bukonkelepo, kuti naeba Yehova ukuti nalibomfya inshita yandi bwino?’ (Yakobo 4:14) Bushe te kuti mulande na Yehova mwi pepo nomba line, ukumwebekesha ukuti mulefwaisha ukubomfya bwino inshita yenu nge Nte yakwe? (Amalu. 90:12) Pepeleni ukuti Yehova amwaafwe ukwangusha imikalile yenu. Nangu ca kuti pambi kale mwapingwilepo ukuti te kuti mubombe bupainiya, bushe nomba tamulemono kuti imibele mulimo kuti yamusuminisha ukubomba bupainiya?

¹¹ Bombesheni Ukulingana ne Mibele Mulimo: Kwena natwishiba ukuti te bonse abengafwaya ukubomba abengafisha pa maawala 70 pa mweshi ukubomba nga bapainiya pantu imibele yalipusanapusana. Nangu cibe fyo, bakasabankanya abengi balatantika ukuti bakalebomba amaawala 50 pa mweshi mu butumikishi nga bapainiya ba kwafwilisha libili libili atemwa ukutwalilila. Nga ca kuti pali ino nshita imibele tailemusuminisha ukubomba bupainiya bwa kwafwilisha mwifuupulwa. Twalilileni ukupepa ukuti imibele mulimo ikaaluke. Pali nomba, nga cine cine tamwingaalula imibele, sansamushiweni pa kwishibo kuti Yehova alatemunwa nga nshi ku cili conse ico mwingacita ukulingana na maka yenu mu kumubombela no mutima onse. (Mat. 13:23) Alamona ukuti mwaba ku lubali lwakwe mu kushangila no kuti muletukuta na maka ukuba kasabankanya wa bucishinka uushiciluka umweshi nangu umo ukwabulo kushimikilapo. Nakalimo kuti mwalunduluka mu kuwamyako imishimikilile yenu, ukubombesha pa kuti mwingaba kashimikila kabili kasambilisha wa mbila nsuma uwafikapo.—1 Tim. 4:16.

¹² Apo “ubushiku bwa kwa Yehova, ubukulu kabili ubwa kutiinya” nabupalamisha, tulekabila ukubomfya inshita isheleko bwino pa kuti twingapwisha umulimo twapeelwa ukubomba. (Yoele 2:31) Satana alishiba ukuti inshita yakwe naicepa, kabili alecishapo ukubombesha ukufika apo engapesha, ukutulenga ukupamfiwa mu bumi ku kuleka citukosele ukwangwa ku fintu fyacindamisha. (Fil. 1:10; Ukus. 12:12) Mwisuula ukuti Lesa tayangwako kuli imwe. Yehova kuti amwaafwa ukwangusha imikalile yenu pa kuti mwingabomba ukulingana na maka yenu mu butumikishi. (Amalu. 145:16) Ku ca buseko, abengi ilyo bapimununa imibele balimo, balesanga ukuti kuti batendeka bupainiya bwa kwafwilisha no bwa nshita yonse. Cine cine, bapainiya balekushiwa apakalamba lintu babomfya inshita yabo bwino. Bushe mukailunda kuli bene?