Amapaalo Yaba Muli Bupainiya
1, 2. Mapaalo nshi yayampana sana na bupainiya, kabili mulandu nshi?
1 Painiya umo atile: “Nalishiba ukuti takwaba umulimo umbi uwinganenga ukuumfwa bwino ngo mulimo wa kwebako bambi icine.” Umbi na o atile: “Pa mpela ya bushiku bumo na bumo, tulawamo tulo twandi, kabili umutima wandi wisulamo ubuseko.” Ifi aba bapainiya bomfwa e fyumfwa na bamunyinefwe na bankashi konse konse abamona amapaalo yaba muli bupainiya.—Amapi. 10:22.
2 Cilomfwika bwino icine cine ukwafwa bambi ukwishiba Icebo ca kwa Lesa icingabekusha icine cine. (Imil. 20:35; 1 Tes. 2:19, 20) Painiya umo umukokole alembele ati: “Ukumona ifyo Icebo ca kwa Lesa cakwata amaka ya kulenga abantu ukwalula imibele yabo cilasansamusha kabili cilakosha icitetekelo.” Cine cine, ukuitemenwa kwa bapainiya ukwa kwafwa abantu no kutungulula amasambililo ya Baibolo, kulenga balaipakisha amapaalo yaba nga aya.
3, 4. Bushe bupainiya bulenga shani umo ukushintilila pali Yehova, kabili ici cafwa shani umo ukukula lwa ku mupashi?
3 Ukushintilila Pali Yehova: Ukushintilila lyonse pa mupashi wa kwa Lesa ilyo balebomba ubutumikishi bwabo kulaafwa bapainiya ukukwata “ifisabo fya mupashi” kabili kulabacingilila. (Gal. 5:16, 22, 23) Kabinge, apo balabomfye Cebo ca kwa Lesa lyonse, bapainiya ilingi line balalamuka mu kubomfya Amalembo ku kusoselako icine no kukosha bambi. (2 Tim. 2:15) Munyina umo uwabomba bupainiya pa myaka yafulilako atile: “Bupainiya bwalingafwa ukwishiba ifyashika fya mu Baibolo, kabili nalibomfya uko kwishiba ku kwafwa abantu ukwishiba Yehova no bufwayo bwakwe.” Ici cintu cilekusha nga nshi!
4 Bapainiya ba nshita yonse bafwile ukushintilila pali Yehova na muli fimbi ifingi. Icitetekelo cabo cilakoshiwa ilyo balemona ifyo abapaala mu kubombesha kwabo no kubapayanishisha ifya ku mubili. Painiya wa myaka ya bukulu 72, uwabomba pa myaka 55 atile: “Yehova tatala andekelesha.” Bapainiya balaicingilila na ku masakamika yambi aya mu bumi pantu bekala imikalile yayanguka. Bushe na imwe kuti mwatemwa ukucingililwa ku masakamika ya bumi?—Mat. 6:22; Heb. 13:5, 6.
5. Bushe bupainiya bwafwa shani umo ukupalama kuli Yehova?
5 Ukupalama Kuli Lesa: Bucibusa bwesu na Yehova e cuma twakwata icaumo mutengo. (Amalu. 63:3) Ilyo twabomba sana mu butumikishi pa mulandu wa kutemwa Yehova, cilalenga twapalama sana kuli wene. (Yako. 4:8) Umo uwabomba bupainiya ukucila pa myaka 18 atila: “Bupainiya butulenga ‘ukusonda no kumono kuti aliwama Yehova,’ kabili cila bushiku tulakosha bucibusa bwesu na Kalenga wesu.”—Amalu. 34:8.
6. Cinshi bapainiya bafwile ukukwata, kabili ni bani bambi abanonkela muli bupainiya bwabo?
6 Ukulunda pa mibele ingasuminisha umo ukubomba bupainiya, bapainiya balingile ukuba ne citetekelo cakosa, ukutemwa Lesa na banabo icine cine, no kuitemenwa ukuipusula fimo. (Mat. 16:24; 17:20; 22:37-39) Lelo, nga fintu bapainiya ba nsansa konse konse bengasosa, amapaalo yaba muli bupainiya yena yalifulisha. (Mal. 3:10) Te bapainiya fye beka bakwata aya mapaalo, lelo indupwa shabo na ba mu cilonganino balanonkelamo nga nshi mu mibele ya mutima iisuma iya bapainiya.—Fil. 4:23.