Bushe Mwalilembesha Magazini Wenu uwa Kushalika?

¹ Bushe mwalitala amuyapo ku kukumana kwa mulimo wa mwi bala no kusanga ukuti mu cola cenu tamuli bamagazini? Kwena, ibukisheni ica mu kati ica mu Ubutumikishi Bwesu Ubwa Bufumu ubwa September 1995 icaleti “Bomfya Bamagazini Besu Bwino nga Nshi.” Catwebele ukuti “lembesha bamagazini ulefwaya ukulapokelela kuli munyina uubombela kuli bamagazini pa kuti ukakwate impendwa ya makope iyashininkishiwa iya lwafuma lumo na lumo. Muli iyi nshila, iwe no lupwa lobe mukalakwata bamagazini lyonse kabili abakumanina.” Bushe mwalilembesha?

² Bushe te kuti mulembeshe magazini wenu uwa kushalika palya bashitishisha magazini? Lyene cikalamupamfya sana ukwananya aba bamagazini cila mulungu, kabili mukasanga ubuseko ubwingi mu kucite fyo. Nga mwalilembesha kale bamagazini benu aba kushalika, moneni nga ca kuti mupokelela abalinga abo mwingabomfya umweshi onse mu butumikishi. Kwena, tufwile ukuba aba cishinka no kwishiba ukuti mulimo wesu ukulasenda magazini wesu twalembesha cila mulungu. Nga ca kuti muli no kufuma pa cilonganino pa nshita yalepako, ishibisheni umubomfi wa magazini nga ca kuti mulefwaya bamagazini benu bakalepeelwa kuli umbi ukufikila mukabwele.

³ Ici cine ica mu kati tulumbwile pa muulu casosele no kuti tufwile “ukutantika ubushiku bwa magazini ubwa lyonse.” Bushe mwakulasangwako ku Bushiku bwa Magazini ubwa cila mulungu? Nga fintu calangililwa pali Kalenda wa Nte sha kwa Yehova uwa 1999, ubushiku bwa magazini bukalaba pa Fibelushi fyonse muli uno mwaka! Ishibeni ukuti ukwananya bamagazini ba Ulupungu lwa kwa Kalinda na Loleni! mulimo uwacindama nga nshi. Ilyo tuleibikilishako ukubombako mu mulimo wa magazini lyonse, ninshi ‘tulebile mbila nsuma’ ku banensu.—Esa. 52:7.