Icebo ca Kusesema Ica kwa Lesa Cikafishiwapo Conse!

¹ Inte sha kwa Yehova lyonse fye shilafwaisha ukumfwikisha ukusesema kwa mu Baibolo. E co twalitemenwe nga nshi ukumfwa ukuti umutwe we bungano lya citungu ilya uno mwaka wali no kusoso kuti “Icebo ca Kusesema ica kwa Lesa.” Twalefwaisha ukulya “ifya kulya mu nshita iyene,” ifyo Yehova atupekanishishe. (Mat. 24:45) Awe na cine alituliishishe.

² Ifishinka Fikalamba Ifye Bungano: Ilyashi likalamba ilyaliko pa bushiku bwa kubalilapo ilyaleti, “Angweni ku Cebo ca Kusesema ica kwa Lesa,” lyalandile na pa fishinka fyaibela pa kwaluka kwa kwa Yesu. (Mat. 17:1-9) Lyakomailepo kuti pali nomba tuli apepi no kutendeka imikalile ishaiwamina pantu tuli sana mu nshiku sha ku mpela, ilyo imicitile ipya ipaleme nga nshi! Inshila yacindama iya kwangwa ku Cebo ca kwa Lesa kupitila mu kucibelenga lyonse. Amalyashi yakonkene ayali no mutwe wa kuti “Bekelweni mu Kubelenga Icebo ca kwa Lesa” yatubulwileko inshila ishisuma pa kuti tulenonkelamo sana no kuipakisha ukubelenga Baibolo.

³ Icungulo kasuba pa bushiku bwalenga shibili twaumfwile imilandu tushilingile ukulatwishikila ukuti tuli mu nshiku sha kulekelesha. Bushe kuti mwaibukisha iyi milandu yonse? Pa bwalenga shitatu, ulucelo, cali kwati Habakuki e lyo alesesema ilyo twalesambilila ukuti inshita yesu naipalana sana ne nshita yakwe no kuti ifintu fya kucincimusha fyalaswa fiseko ilyo Yehova ali no konaula ababifi no kupususha abalungama. Bushe mwalyumfwile umwalolele icilangililo ca mu Baibolo pa lwa kwa Yakobo na Esau? Tufwile ukushombokela amapaalo ya kwa Yehova, ukukaanya umupashi wa kukanayangwako.

⁴ Icitabo Cipya ica Kucincimusha: Fintu twali abacankwa ukupokelela icitabo cipya icaleti, Angweni ku Kusesema kwa kwa Daniele! Ukwabulo kutwishika mulebelenga ici citabo ica kuti nga watampa ukubelenga te kuti ufwaye ukucituula. Kalanda uwafumishe ici citabo atile: “Ukusesema konse ukwa mwi buuku lya kwa Daniele kwalifishiwapo kano fye ifishinka fimo fimo.” Bushe ici tacilelangilila umulandu inshita shesu shibelele ishe pamfya?

⁵ Ibungano lyalitukosha nga nshi ukuti nangu cibe shani amalayo ya kwa Lesa ayashilati yafikilishiwe yali no kufishiwapo. Twalicincishiwa ukutwalilila ukwebako bambi icebo ca kusesema ica kwa Lesa!