Umukululo wa Fipusho

◼ Bushe ukuwamya Ing’anda ya Bufumu waba mulimo wa bani?

Ing’anda ya Bufumu iya busaka kabili iya kucebusha ilomfwana bwino no bukombe tubilisha. (Linganyeniko 1 Petro 2:12.) Calicindama ukuisunga iya busaka kabili iyapempenkana. Uuli onse fye kuti abombako pa kuisungilila iya busaka. Tatulingile ukwenekela abantu fye abanono ukuti e bafwile ukubomba uyu mulimo. Ilingi line, ukuwamya Ing’anda ya Bufumu kutantikwa ukupitila mu mabumba yasangwa pe Sambililo lya Citabo pa Cilonganino, kabili uuba solwesolwe sana muli uyu mulimo ni katungulula we sambililo lya citabo nelyo kaafwa wakwe. Muli yalya Mayanda ya Bufumu ayabomfiwa ne filonganino ifingi, baeluda bakatantika bwino ica kuti icilonganino cimo cimo cilebombako mu kusungilila icikuulwa ica busaka.

Ni nshila nshi iisuma twingabombelamo iyi ncito? Ing’anda ya Bufumu ilingile ukuwamishiwa ukulingana no kutantika kwa lyonse. Ifibombelo fya kuwamishako fifwile ukubapo lintu kuli ukuwamya. Umutande wa filingilwe ukubombelwapo ufwile ukubikwa apo bakabomba bengalamona pa kukonka ubutungulushi. Kuti pambi kwabako imisango ibili iya mitande, umo wa kuwamya fye kwa patali patali pa numa ya kulongana kumo na kumo na umbi wa kuwamya kwa mutima nteka ukwa cila mulungu. Katungulula we sambililo lya citabo afwile ukutantika ubushiku ne nshita iya kwisawaminisha bwino bwino iyo ingawamina bonse abapeelwe umulimo wa kuwamya. Ulunkoto, amaluba, ne fimpusa filingile ukusakamanwa lyonse. Mu tushila e lyo na mu ncende mwimikwa bamotoka tamulekabilwa ukusangwa ifisooso ifili fyonse. Cila mwaka kulekabila ukubako ukuwamya kwa mutima nteka, nakalimo pa nshita ya Cibukisho. Ici kuti casanshamo ukuwamya amawindo ne fibumba, ukuwamya kapeti, e lyo no kuwamya ifyakobekwa.

Ifwe bonse kuti twacefyanyako iyi ncito pa kukanapoosa cungamu nelyo ifipepala mu kati na ku nse ya Ng’anda ya Bufumu. Ilyo twapwisha ukubomfya icimbusu, lekeni tucishe ica busaka pa kuti uuleisakonkapo acisange icapempenkana. Te kwesha ukonaula ifibombelo nelyo ifipe fya mu Ng’anda ya Bufumu. Nga mwasanga apo kapeti yakowela, ifipuna ifyaonaika, apo umupaipi ulesuma, apo amalaiti yapwile, na fimbipo, mwiikata na ku cani ukwishibisha munyina uulolekesha pa kulungisha ifileonaika ku Ng’anda ya Bufumu.

Shi lekeni ifwe bonse tuitemenwe ukubombako. Ukucita ici kulenga ing’anda ya kupepelapo ukuba iya busaka kabili citwishibisha ukuti tuli bantu ba busaka abacindika Yehova Lesa.—1 Pet. 1:16.