Shininkisheni Ukuti Mwabwelelako!
1 “Kwena ukulanshanya kwaciwama! Mfwile ukwibukisha ukubwelelako ku cipempu.” Bushe mwalitala amulandapo ifyo e lyo mwalaba ukwikala uyo muntu? Nga ni fyo, ninshi mwalishiba ukuti nga mulefwaya ukushininkisha ukuti mwabwelelako, cisuma ukulemba.
2 Lembeni Fyonse: Ilyo mucili muleibukisha ifyo mwacilandapo no ulefwaya ukwishibe cine, lubuleniko akashita no kulemba ifyebo fyonse ifingafwaikwa pa lwa uyo muntu. Lembeni ishina lyakwe ne fyo mwingamwibukisha. Lembeni inambala ya ng’anda, lelo mwitunganya fye, bebeteni ku kushininkisha ukuti mulembele iyalungama. Lembeni ifyo mwacilandapo, amalembo ayali yonse mwacibelenga, no lupapulo mwacimushiila.
3 Nga mwacimwipusha icipusho ca kwasuka ilyo mukabwelelako, cilembeni. Bushe pali ifyo mwacimonapo pa lwa uyo muntu, ulupwa lwakwe, nelyo kuntu apepa? Nga ni fyo, filembeni. Lyene ilyo mukabwelelako, nga mwalumbulapo cimo pali fyo, cikalangilila ukuti mulefwaisha ukwafwa uyo muntu. Mu kulekelesha, lembeni ubushiku ne nshita mwalanshenye no yo muntu ne yo mwaumfwene ukubwelelako. Nga mwalemba bwino, mukakwata ifya kumucinkulako ifyashininkishiwa kabili napamo tamwakalabe ukuti mwalilaile ukubwelelako.—1 Tim. 1:12.
4 Ilyo mwalemba fyonse ifyo, bikeni ico mulembelepo capamo na fimbi ifyo mubomfya mwi bala—pamo nga icola, Baibolo, icitabo ca Ukupelulula, ne mpapulo shimbi—pa kuti tamwishilecula ukufwaya. Cisuma ukulekanya apa kulemba amayanda apashili abantu nga mulebomba ku ng’anda ne ng’anda na pa kulemba ifipempu fya kubwelelamo. Kwena, te mulandu no kubombesha kwa kukwata icalembwa ca fipempu fya kubwelelamo, icacindama kushininkisha ukuti mwabwelelako!
5 Tontonkanyeni pa lwa Uyo Muntu: Ilyo mulepekanishisha ubutumikishi, pitulukeni pa fyo mwalembele pa lwa bantu mulebwelelako. Tontonkanyeni pa lwa muntu umo umo no kumona ifingawama ukulandapo ilyo mwabwelelako. Tontonkanyeni fintu mwingalenga uyo muntu ukufwaisha isambililo lya Baibolo ilya pa ng’anda. Iyi mipekanishishe kuti yalenga imwe pamo ngo mutumikishi wa mbila nsuma ukukwata abasambi abengi, e lyo no kulundako ubuseko bwa pa lwenu.—Amapi. 21:5a.
6 E co umuku ukakonkapo ilyo mukasanga uwakutika, mwikatila mwalasungila fye ku mutwe. Lelo, lembeni, pitulukeni mu fyo mwalembele, twalilileni ukutontonkanya pa lwa uyo muntu, no kushininkisha ukuti mwabwelelako!