April—Inshita ya Kucincilile Milimo Isuma!

¹ Ilyo icikuuku ca mwela cilepalamina ku ncende ukwikala abantu, ukusoka abantu ulwa busanso buleisa kulacilapo ukupamfya. Ilyo icikuuku cilepalama sana, e lyo no kusoka kuluminako. Mulandu nshi? Pantu abantu kuti bafwa! Napamo bamo tabaumfwileko ukusoka kwa ntanshi. Bambi napamo balyumfwile lelo tabacitilepo nangu cimo. E fyo caba na ku kusoka kwa bulesa uko twatumwa ukubilisha ilyo “icikuuku ca mwela” ica bukali bwa kwa Lesa ubwalungama cishilakukulula tonse fye utwa muli cino calo cibifi. (Amapi. 10:25) Imintapendwa ya bantu kuti bafwa no kupanya umweo wa muyayaya! Tufwile ukubilisha ukusoka. Tufwile ukuba “abacincilile milimo isuma.”—Tito 2:11-14.

² Pa myaka iingi nomba, abantu ba kwa Yehova balifikwa pa mutima ica kuti balenga iciputulwa ca mwaka ilyo kuba Icibukisho ukuba inshita ya kupimpa kwaibela mu butumikishi. Mu kubangilila kwa mwaka wa 1939, Informant (Kalanda) iyi twita nomba ati Ubutumikishi Bwesu Ubwa Bufumu, yakoseleshe ati: “Apo shinde nasungamina, kabili imiceele ikawama, tuleenekela ifilonganino ukufusha imiku ibili inshita babomba mwi bala, kabili tuleenekela na bapainiya na bo ukulundako sana inshita. Umweshi wa April ukwete inshiku sha pa Mulungu shisano. Kabili ikwete Ifibelushi fisano. Teyanyeni ukuti Icibelushi icili conse mu April no bushiku bwa pa Mulungu . . . ibe nshita ya kushimikila kwaibela.” Ico cali cikongwani cakosa ico bamunyina balya bapeelwe imyaka 60 iyapitapo! Nga fintu fye cali mu 1939, na uno wine mwaka umweshi wa April uli ne Fibelushi fisano, ne nshiku sha pa Mulungu na sho shisano. Mapange nshi mukwete uno mweshi? Finshi mulembele pali kalenda wenu pa mweshi wa April 2000? Pangeni ukubombako bwino sana imilimo isuma capamo na bantu ba kwa Yehova bonse muli uyu mweshi waibela uwa kukalakasha imibombele ya ku mupashi.

³ Ifyo Tulesubila Ukubomba: Ubushiku bwacindamisha mu mwaka wa 2000 buli muli uno mweshi. Bushiku bwa pa April 19, apakaba ukwibukisha kwa pa caka ukwa mfwa ya kwa Yesu. Natubombeshe na maka yesu yonse ukulaalikako abantu abengi ukufika apo twingapesha ukuti bakese ku Cibukisho. Nga fintu catubulwilwe umweshi wapwa, lembeni umutande wa bengasangwa ku Cibukisho no kushininkisha ukuti tapali abasheleko. Kuti mwalaalikako bakasabankanya baleko kubomba, abasambi ba Baibolo, ifipempu fya kubwelelamo, abasambililepo Baibolo kale, abo mubomba na bo, abo musambilila na bo ku sukulu, abena mupalamano, balupwa, na bambi abo mwaishibana fye na bo. Bushe bonse abalefwaya ukusangwako bakenda fye bwino? Nga te ifyo, bushe kuti mwaitemenwa ukubaafwako? Pa bushiku bwa Cibukisho, ifwe bonse tukaba ne shuko lya kulenga bonse abalesangwako ukuyumfwa ukuti nabapokelelwa. Pa numa ya Cibukisho, kuti twakonkanyapo ukwafwilisha lwa ku mupashi abo abalefwaya ukwishibe cine.

⁴ Ukuba “abacincilile milimo isuma” mu nshiku sha pa ntanshi na pa numa ya Cibukisho ni nshila isuma iya kulangishishamo Yehova ukuti tulatasha sana pali fyonse ifyo atucitila. Apo nomba imiceele naiwaminako, abengi tuli no kulundako ukubombesha mu mulimo wa kubila. Nga ca kuti mulebomba bupainiya bwa kwafwilisha, mukafwaya ukubombesha sana ukuti mukafishe amaawala 50 mu butumikishi nelyo ukucilapo. (Mat. 5:37) Konkeni bwino bwino ukutantika mwatantike ku kutampa kwa mweshi. (Luk. Mil. 3:1; 1 Kor. 14:40) Shi ifwe fwe bashala natubombeshe ukufika apo twingapesha ku kutungilila bapainiya, ukupitila mu kubakoselesha no kubomba pamo na bo mwi bala. (Linganyeniko 2 Ishamfumu 10:15, 16.) Nga ca kuti mu kupimpa twatanda mu April, kuti twaenekela ukusekelela kukalamba ne paalo kuli Yehova. (Mal. 3:10) Napamo ici e cingatwafwa ukutendeka ukubomba bupainiya bwa kwafwilisha ubwa libili libili nelyo bupainiya bwa nshita yonse. Shi ukufundumana tukatampa na ko mu April nakukasempaukile na mu myeshi ikakonkapo ilyo tuletwalilila ukuba bakabila ba Bufumu aba lyonse.

⁵ Takuli no kutwishika ukuti abantu ba kwa Yehova abengi bakatampa amasambililo ya Baibolo aya mu ng’anda na yambi muli uyu mweshi. Bushe kuti mwatemwa ukutampapo limo? Pepeleni ico mu kulungatika, no kubomba umwabela amapepo yenu. Teti mutwishike ukuti Yehova akatesekesha ukulomba kwenu ukwaicefya ukwa kuti amwafwilishe ukusanga umuntu wafumaluka uwa kusambilisha.—1 Yoh. 3:22.

⁶ Pano pali imilandile bamo babomfya mwi bala iyabomba bwino ku kutampa ukulanshanya. Kuti mwatendeka ne cipusho amuti: “Bushe kuti mwatila ulukaakala luli mu bwikashi bwesu fibanda filenga nelyo mulandu wa kuti abafyashi tabafunda abana babo?” Lekeni basuke. Nga ca kuti batila “fibanda filenga,” belengeni Ukusokolola 12:9, 12, no kulanda pa fyo Kaseebanya alenga icimfundawila ukufulilako mu calo. Lyene kupukuleni pe sambililo 4 muli broshuwa wa Cintu Lesa Afwaya no kubepusha nga balitala abatontonkanyapo ukwafumine Kaseebanya. Tendekeni ukubelenga no kulanshanya amaparagrafu ya kubalilapo yabili. Nga ca kuti batila icalenga ulukaakala mu bwikashi nico “abafyashi tabafunda abana babo,” lyene belengeni 2 Timote 3:1-3 no kulanda pa mibele iyo tushiletwishika ukuti na yo e yalenga ubu bwafya. Lyene kupukuleni pe sambililo 8 muli broshuwa wa Cintu Lesa Afwaya, belengeni paragrafu 5, no kutwalilila ukulanshanya. Nga mwingapangana na bo ukuti mukabwelelako, ninshi mulepansa inshila ya kuyatendeka isambililo lya Baibolo na bo. Mu kutandala kukakonkapo, mukabepushe nga kwingaba uuli onse uwingafwaya ukumfwako ifyo balesambilila.

⁷ Inshila na imbi iya kuba “abacincilile milimo isuma” mu April ili kubombako imbali shalekanalekana isha kushimikila. Bushe mwalitontonkanyapo ulwa kushimikila mu parka nelyo umo bemika bamotoka? Pa citesheni ca mabasi nelyo ica mashitima? Nelyo bushe kuti mwafwaya ukushimikila pa foni, mu musebo, nelyo mu ncende ya bukwebo? Cinshi mushingesesha ukucite fyo fine muletontonkanyapo uno mweshi? Yehova akamwafwa ukuti mube no kupama mulekabila. (Imil. 4:31; 1 Tes. 2:2b) Napamo kuti mwapangana ukubomba na painiya nelyo kasabankanya uwabelesha muli ishi mbali sha butumikishi.

⁸ Abali bonse abalefwaya ukwingilishako imibombele yabo mu mulimo wa kushimikila kuti bafwaya ukubombako ubunte bwa mu lyashi. Ilingi icifwaikwa fye kutampa ukulanda no muntu muli bucibusa. Kuti mwaimya fye ilyashi ilyo engafwaya ukupoosapo, napamo ukubomfya imilandile ilangililwe mu paragrafu 6. Tukuteni ukubomfya bwino inshita nangu icepe shani, ukucila ukuti iye fye mu menshi. Mulandu nshi mushingabomfesha bwino amaminiti nangu 5, nelyo 10, atemwa 15 ku kucitilo bunte bwa mu lyashi, e lyo no kuyalemba?

⁹ Inshita ya Kutontonkanyapo: Tontonkanyeni pa lwa fishinka fyalandilwepo mu cilangililo ca pe Bungano lya Citungu ilyaleti “Icebo ca Kusesema ica kwa Lesa” ilya mwaka wapwile. Icilangililo, icakwete umutwe wa kuti “Ukukatamika Ubupyani Bwesu Ubwa ku Mupashi,” catulengele ukutontonkanyapo sana pa lwa bupusano bwali pali Yakobo na Esau. Esau atile alitemenwe ifya ku mupashi nga fintu na Yakobo afitemenwe, lelo imilimo ya kwa Esau tayalelange fyo. (Ukute. 25:29-34) Mwandi kusoka kwa maka uko kuli ifwe! Natube nga Yakobo, ukuiteyanya ukulwisha, nelyo fye ukushombokela ipaalo lya kwa Yehova. (Ukute. 32:24-29) Mulandu nshi te kubomfesha umweshi wa April ne myeshi ikakonkapo ukubukulula ukupimpa kwesu, ukukanapepula ubupyani bwesu ubwa ku mupashi ubwawamisha?

¹⁰ “Nabupalamo bushiku bukulu bwa kwa Yehova, nabupalama no kwangufyanisha.” (Sefa. 1:14) Imbila nsuma ya Bufumu ifwile ukubilwa. Abantu kuti bafwa! Lekeni uno mweshi ube mweshi wapaalwa ku bantu ba kwa Yehova bonse ilyo tulelangisha mu kwikatana ukuti twaba “abacincilile milimo isuma.”

[Akabokoshi pe bula 4]

Ifya Kucinkulako pa lwa Cibukisho

Uno mwaka, Icibukisho cikaba pali Citatu, pa April 19. Baeluda bafwile ukusakamana ifyakonkapo:

◼ Pa kusala inshita ya Cibukisho, shininkisheni ukuti ifimpashanya tafyakapitemo ilyo akasuba kashilawa.

◼ Bonse fye na kalanda kumo, bafwile ukwebwa inshita ya Cibukisho na kuntu cikabela.

◼ Umukate ushatutumuka na waini fifwile ukushitwa no kupekanishiwa.—Moneni Ulupungu lwa kwa Kalinda ulwa February 15, 1985, ibula 19.

◼ Imbale, amatambula, itebulo lyayana ne nsalu fifwile ukuletwa mu kubangilila no kupekanishiwa.

◼ Wamisheni kabela bwino bwino Ing’anda ya Bufumu nelyo icikuulwa mulebomfya.

◼ Bakapyunga na bakupishamo bafwile ukusalwa no kwebelwa kabela umulimo wabo ne fya kucita.

◼ Kufwile ukuba ukupekanya kwa kutwalila uuli onse uwasubwa kabili uwafilwa ukusangwako.

◼ Nga ifilonganino ifyafulilako filebomfya Ing’anda ya Bufumu imo ine, fifwile ukumfwana bwino bwino pa kuti abantu tabafulishe pa mwinshi, umwakupita, no mwa kwimika bamotoka.