Umukululo wa Fipusho

◼ Ni shani fintu bakapyunga bengafwilisha abafyashi pa kuti bengasunga abana babo pa kutila kube ukusungilila umuyano pa kulongana?

Mu cifyalilwa fye, abana baba abamansauka, kabili tababelesha ukwikala inshita ntali. Ilyo ukulongana kwapwa, abaice balakwata amaka bashacilabomfya kabili kuti yabalenga ukulabutauka nelyo ukulapepekana mu Ng’anda ya Bufumu nelyo ififulo fimbi ifya kulonganinapo, umwa kwimika bamotoka, atemwa mumbi umwa kupita. Lelo ipinda lya cine litila: ‘Umwaice uwalekeleshiwa alenga abafyashi insoni.’—Amapi. 29:15.

Ku ca bulanda, bamunyina bamo na bankashi abacikoloci balicenwa ububi pa mulandu wa bacaice abalebutuka ababapunkile no kubaponya. Ici calilenga abafyashi ne cilonganino ukuiletelela ukucula elyo no kupoosa indalama shishali na kupooswa. Pa kuti abana beicena kabili becena bambi, tabafwile ukusuminishiwa ukulabutauka no kwangalila mu Ng’anda ya Bufumu nelyo pa nse.

Mulimo wa mu Malembo uwa bafyashi ukukansha abana babo ukucindika ififulo fya kupepelapo. (Luk. Mil. 5:1a) Pa kulongana kwesu ukwa Bwina Kristu, ukulongana kukalamba, na mabungano, bakapyunga balapeelwa umulimo wa kumona ukuti “fyonse [fyacitwa] busaka busaka” kabili kwaba ‘ukwikala busaka busaka.’ (1 Kor. 14:40; Kol. 2:5) Bafwile bayangwa mu kati na ku nse ilyo ukulongana kushilatendeka, ilyo kuletungululwa, na lintu kwapwa. Nga ca kuti umwana alebutauka nelyo alepumfyanya, mu cikuuku kapyunga kuti alesha umwana, no kulondolwela umwana umulandu fintu alecita filubanine. Abafyashi ba uyo mwana na bo bafwile ukwebwa mu cikuuku pa lwa fyo alecita no kuti balekabila ukusakamana umwana. Abafyashi bafwile ukucite ifyo fine.

Twalishiba ukuti inshita shimo shimo utunya na bana banono kuti balila nelyo ukupumfyanya bambi ilyo kuli ukulongana. Bakapyunga, abafikile nalimo amaminiti 20 ilyo ukulongana kushilatendeka, kuti basha ifipuna fya ku numa ukwabula ukutekapo abantu pa kuti abafyashi bali na bana banono bengekalapo nga balefwaya. Fwe bashala tufwile ukumfwila bakapyunga no kukanaikalapo.

Nga ca kuti umwana alepumfyanya, abafyashi bafwile ukucitapo cimo. Nga ca kuti abafyashi tabacitilepo nangu cimo kabili ukupumfyanya kwacilamo, kapyunga afwile mu cikuuku ukwipusha abafyashi nga kuti batemwa ukutwala umwana pa nse. Nga twalalika abapya na bana babo abanono ku kulongana, tufwile ukwikala na bo no kubaafwako ukusunsuntila abana nga batendeka ukulila nelyo ukupumfyanya mu nshila shimbi.

Tulaba ne nsansa lintu twamona abana ba mishinku yonse pa Ng’anda ya Bufumu no kumona imibele yabo iisuma mu ng’anda ya kwa Lesa. (1 Tim. 3:15) Ukupitila mu kucindika ififulo fya kwa Yehova ifya kupepelapo, balamucindika kabili bonse aba mu cilonganino balatasha pa kukwata aba abacaice.