“Bushe Nkakuuke?”

¹ Pa kumfwila ukukambisha kwa kwa Yesu ukwa kuti “kabiyeni, kalengeni aba nko shonse ukuba abasambi,” ababomfi ba kwa Yehova abaipeela abengi balikuuka no kuya ku kubombela ukuli ukukabila kwakulilako. (Mat. 28:19) Bapashanya Paulo, uwaumfwilile ubwite bwa kuti: “Mwise mwabukile ku Makedonia no kutwafwa.” (Imil. 16:9) Ici kuti cacitwa shani mu nshila ingabomba bwino?

² Bombelenipo Buce Buce: Bushe mu cilonganino cenu mwaliba incende iishibombelwamo libili libili? Nga ni fyo, ninshi emo mwingafwaya ukupoosesha amano. Ilyo mushilapingula ukukuukila kumbi, lanshanyeni na baeluda ba pa mwenu no kumona nga baletontonkanya ukuti namufikapo ukukuukila kumbi. Kuti mwaipusha na kangalila wenu uwa muputule nga alishibako ifilonganino fimo umo mwingayabombela. Lelo, pa numa ya kwikala no kulingulula bwino, napamo kuti mwafwaya ukutontonkanya pa lwa kwafwilishako ku ncende imbi mu calo cenu atemwa ku calo cimbi. Nga e fyo mulefwaya, ninshi imwe, pamo ne bumba lyenu ilya baeluda, mulingile ukulemba kalata kwi ofeshi lya mu myenu ilya Watch Tower ukubeba uko mulefwaya ukuyabombela, ukulanda bwino bwino imibombele yenu iya teokrasi iya ku numa. Kuti cawama ukuyatandalila ico cifulo ilyo mushilapingula nampo nga mukakuuka ukuyaikalilila uko kwine nelyo iyo.

³ Cenjeleni pa lwa Kukuukila ku Calo Cimbi: Bamunyinefwe abengi balekuukila ku fyalo fimbi pantu balefwayako imikalile ilondolwekeko nelyo ukufyuka ku mutitikisha. Mu kucite fi, bamo balibaliila pa mitwe ku bantu ba bufumfuntungu mu fyalo baya, ababalaya ukuti bali no kubafwa lelo kuli pele pele babebila fye ndalama no kubasho lweko. Inshita shimo, aba bantu bapatikisha na bakuukila mu fyalo fyabo ukulacita ifya bupulumushi nelyo ifya bufumfuntungu. Nakana nga te ifyo, babasha fye ukuti baimwene abene. Ico calenga abakuukila mu fyalo fimbi ukuisanga balecululuka ukucila ne fyo bali mu calo cabo. Limo limo kuti bafwaya no kulomba bamunyina ukuti basungweko no kubafwako muli fimbi, na mu kulekelesha ukutwika indupwa shimbi isha Bwina Kristu amafya na yambi ukulunda pa mafya ishi ndupwa kale kale shaba na yo. Indupwa shimo shalipaatukana, kabili ici calenga shanakuka lwa ku mupashi ku mulandu wa kukanalingulula bwino pa kukuuka.—1 Tim. 6:8-11.

⁴ Nga namukwata imilandu ya pa lwenu iyo mulefwaila ukukuukila, ibukisheni ukuti te mulandu na kuntu muleikala, konse kwaliba amafya. Calyangukako ukucimfya amafya ya musango yo uko mwaishiba kale kale ululimi ne mikalile ya bantu, ukucila ukuyatendeka cipya cipya ku bweni uko mushabelesha na kubelesha.