Ukulundulula Ubuseko Bwabalamwinwe na Trakiti ya Imbila ya Bufumu Na. 36
1 Bushe namupwisha ukwananya amatrakiti ya Imbila ya Bufumu Na. 36 ayo mwapeelwe? Ikwete icipusho calingana ne nshita ico bonse bengatontonkanyapo ica kuti: “Bushe Iyi Imyaka 1,000 Iipya—Finshi Imukwatile?” Ilyo umwaka wa 2000 walepalama, ifyo abantu baleenekela mu myaka 1,000 iipya fyalipusene nga nshi. Trakiti ya Imbila ya Bufumu Na. 36 nailanda pali fimo ifyo abantu baleenekela kabili yatucinkulako no kuti imibele ya calo tailepeela ishintililo lya kwenekela ifisuma. Imyaka fye 1,000 iikaleta umutende no mutelelwe ifyo abantu abengi bafwaya ni ilya iya Kuteka kwa Myaka Ikana Limo Ukwa kwa Kristu Yesu. Ukucetekela kwesu mu Bufumu bwakwe ubwa cine cine kwatulenga ukwananya trakiti ya Imbila ya Bufumu Na. 36 ku muntu onse uo twingayako.
2 Ifyo Bankulako ku Imbila ya Bufumu: Ukwananya kwafumako ukwa matrakiti ya Imbila ya Bufumu kwaliba ca kucincisha cisuma kuli ifwe mu mulimo wesu. Ukulosha kuli trakiti wa Imbila ya Bufumu Na. 35, iofeshi lya Watch Tower ilya ku Canada lyalembele ati: “Uyu kampeni waibela atungililwe na bakasabankanya na bapainiya abali ababilingana ukubomba, kabili baipakishe ifya kukumanya fya kukoselesha ifingi.” Ukwabula no kutwishika ne mwe bene mwalangile ukupimpa kumo kwine pa kwananya trakiti wa Imbila ya Bufumu Na. 36.
3 Uno kampeni uwa kushalika trakiti ya Imbila ya Bufumu akapwa pa November 17, 2000. Bushe icifulo ca kubombelamo ica cilonganino cenu calibombelwamo conse? Nga te ifyo, baeluda kuti bamwipusha ukukonkanyapo kampeni ukufikila pa mpela ya mweshi wa November.
4 Finshi abantu balelandapo ukufika pali ino nshita pali ifi muleananya trakiti ya Imbila ya Bufumu Na. 36 ku mwenu? Bamo bamo bakesushisha akapepala ka kwipushishapo no kulomba broshuwa wa Cintu Lesa Afwaya e lyo napamo ne sambililo lya Baibolo ilya mu ng’anda. Lelo, abengi bamoneka fye apo pene ukutila balefwaya ukumfwa fimo pa lwa myaka 1,000 tacimoneka ukutila kuti bacitapo cimo nga ca kuti Inte sha kwa Yehova tashiibweleleko. Abo bonse abalefwaya ukumfwilapo fimbi bafwile ukutandalilwa na kabili. Ni lilali cikaba icisuma ukucita ici? Tapafwile ukukokola sana.
5 Moneni ifi fya kukumanya ifyafuminemo lintu bamo babwelele uko bashalike trakiti wa Imbila ya Bufumu Na. 35. Painiya ku Ireland ashalike trakiti ya Imbila ya Bufumu ku mwine we shitolo baliilamo. Umwanakashi alitemenwe sana ubukombe bwalimo kabili alaalike nkashi ukubwelelako na kabili. Uyu nkashi alibweleleko mu bushiku bwalenga shibili, ne sambililo lya Baibolo lyalitendeke. Ku Denmark, trakiti ya Imbila ya Bufumu yashilwe pa ng’anda pashali bantu. Bulya bwine bushiku umwanakashi waleikala pa ng’anda ine iyo atumine akapepala ka kwipushishapo kwi ofeshi lya Watch Tower, uko ako kapepala katuminwe ku cilonganino cabela uko kwine aleikalila. Ilyo no mulungu ushilapwa, bankashi babili balimutandalile, batantike no kulamutungulula isambililo, kabili ulya mwanakashi alisangilwe na ku kulongana pa Ng’anda ya Bufumu umuku wa kubalilapo!
6 Ifya Kusosa Ilyo Mwabwelelako: Ukubwelela uko twashile trakiti ya Imbila ya Bufumu tacayafya sana kabili e lubali lumfwika bwino mu butumikishi bwesu. Ilyo mulebwelelako, kuti cawama mwasenda trakiti na umbi uwa Imbila ya Bufumu Na. 36, pantu limbi kuti mwine ng’anda takwete trakiti mwamushilile. Kuti mwaeshako iyi mitubululo.
7 Pa numa ya kucinkulako mwine ng’anda ishina lyenu, kuti mwatila:
◼“Namushilile trakiti yaleti ‘Bushe Iyi Imyaka 1,000 Iipya—Finshi Imukwatile?’ Bushe tamwakoseleshiwe ukubelenga ukuti nomba line fye Ukuteka kwa Myaka 1,000 Ukwa kwa Kristu Yesu kwalatendeka, ukulenga isonde ukuba Paradise? [Mulangeni icikope ca Paradise muli trakiti ya Imbila ya Bufumu Na. 36.] Pano pe bula lya kulekeleshako namulaalikwa ukulomba broshuwa wa Cinshi Cintu Lesa Afwaya Kuli Ifwe?” Mulangeni broshuwa, kupukuleni pe sambililo 5, belengeni icipusho ca kubalilapo na maparagrafu 1 na 2, kabili ipusheni mwine ng’anda ukulandapo. Belengeni ilembo limo nelyo yabili no kulanshanyapo. Nga cingacitika lanshanyeni icipusho na cimbi no kubelenga paragrafu, lyene tantikeni ukubwelelako no kutwalilila ukulanshanya.
8 Apo broshuwa wa “Cintu Lesa Afwaya” nelyo icitabo ca “Ukwishiba” e fyakulashalikwa pa cipempu ca kubwelelamo, kuti mwatila:
◼“Ilyo namutandalile, na mushilile trakiti yaleti ‘Bushe Imyaka 1,000 Iipya—Finshi Imukwatile?’ Mulya mwaba ukutambika isambililo lya Baibolo ilya pa fye. Nabwela ukuti mulange ico tubomfya pa kusambilila. [Balangeni broshuwa wa Cintu Lesa Afwaya, no kwalwila ku nkupo ya ku numa; nelyo balangeni icitabo ca Ukwishiba, no kukupukula pa mabula 188-9.] Imyaka 1,000 iyalandwapo muli Baibolo ikaleta ifyapala nge fi mulemona pano mu cikope. Pa kuti tukekalemo mu Paradise, tufwile ukwishiba bwino Lesa. Mukwai lekeni imulangilile panono fye ifyo tusambilila Baibolo.”
9 Ukwananya trakiti wa Imbila ya Bufumu Na. 36 kwatulenga ukwingilishako imibombele yesu mu butumikishi, ukufumamo no bunte bukalamba. Cilemoneka kwati ici e cilengele no kuti abengi mu cifulo cesu ico tubombelamo balefwaisha ukusambilila. Imibombele yesu iyaikatana ku kulundulula ubuseko ikatulenga aba buseko ilyo tulefwaya abapala impanga pa kuba no kwafwa kwa kwa Yehova.—Mat. 10:11; Imil. 13:48, 49, 52.