Konkeleleni Ubuseko Bwabalamwinwe Muli Trakiti wa Imbila ya Bufumu
1 Mu milungu yafumako inono, twaliba ne shuko lya kwananya trakiti wa Imbila ya Bufumu Na. 35, uuli no mutwe wa kuti “Bushe Abantu Bakatala Abatemwana?” Bakasabankanya ukuli konse balebombesha ukulanda na bayana abengi ukufika apo bengapesha no yu trakiti wa Imbila ya Bufumu. (Mat. 10:11) Nangu cingati uyu kampeni atantikwa ukupwa pa Mulungu, November 16, nga kuciliko icifulo ca kubombelamo icalundwako, nalimo baeluda kuti bamwipusha ukutwalilila ukwananya Imbila ya Bufumu Na. 35 kulila fye amatrakiti emo yali mu cilonganino.
2 Trakiti wa Imbila ya Bufumu alicincimusha abantu abengi. Balamona ukuti abantu mu cinkumbawile baliba abaumalala na muli ifyo tabaishiba icaba ku nshita ya ku ntanshi. (2 Tim. 3:3) Tulefwaya ukukonkelela ubuseko bwabalamwinwe.
3 Imbila ya Bufumu Yakwata Ifya Kufumamo: Mu kati ka kampeni wa 1995 na trakiti wa Imbila ya Bufumu, umwanakashi umo uwapokeleko trakiti alishile ku kulongana pa Ng’anda ya Bufumu pa mulandu wa kuti alefwaya ukusambilila ifyafulilako pa lwa fintu Inte sha kwa Yehova basumina. Pali uko kulongana alipokelele isambililo lya Baibolo kabili pa numa ya ico talepuswapuswa ku kulongana. Mu kwangufyanya, alilembele kwi calici lyakwe ilya kale pa lwa kufuutwa!
4 Pali nomba, imyanda ya bantu mu cifulo ca kubombelamo balibelenga ubukombe muli trakiti wa Imbila ya Bufumu Na. 35. Lelo ni shani fintu bayankwileko? Nangu cingati balitemenwe nga nshi ifyo babelengele, abengi tabakabombelepo ukufikila umo uwa Nte sha kwa Yehova abatandalila na kabili. Bushe mulepanga ukubwelelako? Ukwangwa abantu banensu mu nshila ya kutemwa e kulingile ukutukunta ukucita ifyo. Bonse abasekelela muli trakiti wa Imbila ya Bufumu balingile ukutandalilwa na kabili.
5 Finshi Mukasosa Lintu Mwabwelelako? Nakalimo kuti mwalandapo ifinono pa lwa fintu ubu bukombe bwa muli trakiti wa Imbila ya Bufumu bwishile pa nshita yalinga kabili lyene ipusheni icipusho ca kufwailisha mu muntontonkanya. Kutikisheni lintu mwine ng’anda alelanda pa kuti mwingeshiba ifili mu muntontonkanya wakwe. Lyene landeni pa cishinka calinga muli broshuwa wa Cintu Lesa Afwaya, icali muli trakiti wa Imbila ya Bufumu. Nga ca kuti abantu bayankulako bwino, esheni ukutendeka isambililo lya Baibolo apo pene fye.
6 Pano palipo inshila sha kulandilamo shimo ishatubululwa isho mwingesha lintu mwabwelela kuli abo abasekelele muli trakiti wa “Imbila ya Bufumu” Na. 35:
◼ “Nalimo kuti mwaibukisha ifyebo fyalembwa ifyo namushilile nomba line. Ubukombe bulimo bulelanda pa mulandu wakatama uwalekanya abantu ilelo—ukukanatemwa bambi.” Landeni pa bushinino ubwalondololwa pe bula 2 muli trakiti wa Imbila ya Bufumu pe samba lya mutwe “Ukutemwa Umunensu Kwalibotelela.” Lyene ipusheni ukuti, “Bushe muletontonkanya ifyo yaba mifwaile ya kwa Lesa abantu ukulaikala muli iyi nshila?” Lekeni basuke. Kupukuleni pe sambililo 5 muli broshuwa wa Cintu Lesa Afwaya, kabili esheni ukutendeka isambililo lya Baibolo.
◼ “Lintu twakumene umuku wa kubalilapo, nalimushilile ifyebo fimo ifyali no mutwe wa kuti ‘Bushe Abantu Bakatala Abatemwana?’ Bushe muletontonkanya ukuti icalo ca musango yo kuti cabako?” Lekeni basuke. Kupukuleni pe sambililo 6 muli broshuwa wa Cintu Lesa Afwaya, kabili belengeni paragrafu 6. Lyene belengeni ubulayo bwa kwa Lesa pali Mika 4:3, 4. Nga ca kuti mwine ng’anda asekelela, tambikeni broshuwa ne sambililo.
◼ “Lintu namutandalile umuku wafumako, namushilile ifyebo fyaleti ‘Bushe Abantu Bakatala Abatemwana?’ Mwali ukutambika isambililo lya Baibolo ilya mu ng’anda. Nabwela pa kuti mulange ica kwaafwa ukusambilila cintu tubomfya. [Langeni icitabo ca Ukwishiba.] Ici citabo cilondolola mu kumfwika lintu abantu bonse bakatemwana, kabili casuka ifipusho fimbi ifyo nalimo mutontonkanyapo: Mulandu nshi tukotela no kufwa? Mulandu nshi Lesa asuminishisha ukucula? Cinshi cicitika ku batemwikwa besu nga bafwa? Lyene ipusheni ukuti: “Bushe kuti namulangilila fintu tusambilila?” Nga ca kuti mwine ng’anda akaana uko kutambika, mwipusheni nga kuti atemwa ukuibelengela icitabo umwine. Nga kuti atemwa, mushileni icitabo pa musangulo wa lyonse. Pekanyeni ukubwelelako na kabili.
7 Lintu twapwishishisha ukubombela mu cifulo na trakiti wa Imbila ya Bufumu Na. 35, nalimo kuti twatambika icitabo ca Ukwishiba mu nshita yashalako mu mweshi. Inshila sha kulandilamo ishisuma ishasoobolwa isha kutambikilamo ici citabo kuti mwashisanga ku numa ya Ubutumikishi Bwesu Ubwa Bufumu ubwa December 1995; March, June, na November 1996; na June 1997.
8 Uku kwananya kwaibela ukwa trakiti wa Imbila ya Bufumu kulingile ukukunta ifwe bonse ukulundako ukubombesha kwesu mu mulimo wa kushimikila. Mu kuba no kwaafwa kwa kwa Yehova kuti twacetekela ukuti uyu kampeni akatunguluka mu kushininkisha, ukwaafwa abantu ukumona imifwaile ya kwa Lesa iya kuti abantu bonse batemwana. Shi Yehova natwalilile ukupaala ukubombesha kwesu ukwa mukoosha ilyo tulebwelela uko abantu basekelela muli trakiti wa Imbila ya Bufumu.