Cinshi Tutungulwila Amasambililo ya Baibolo?

¹ Cinshi tutungulwila amasambililo ya Baibolo? Bushe kulenga fye abantu ukwishiba fimo, ukuwamya fye imikalile yabo, nelyo ukulenga baba fye ne subilo lya nshita ya ku ntanshi? Iyo. Icikalamba ico tufwaya kupanga abasambi ba kwa Yesu Kristu! (Mat. 28:19; Imil. 14:21) E co abo tusambilila na bo balingile ukubishanya ne cilonganino. Ukulunduluka kwabo ukwa ku mupashi kwasuntinkanishiwa sana no kumfwikisha ifyo ukuteyanya kwa Bwina Kristu kwaba.

² Ifyo Mwingacita Ico: Pa kwamba fye pene, koselesheni umusambi ukusangwa ku kulongana kwa cilonganino. (Heb. 10:24, 25) Londololeni ifyo ukusangwa ku kulongana kukakosha icitetekelo cakwe, ukumwafwa ukucita ukufwaya kwa kwa Lesa, no kumulenga alabishanya bwino na bambi abafwaya ukulumbanya Yehova. (Amalu. 27:13; 32:8; 35:18) Ifyo mulanda pa kulanga ukutemwa kwenu na fintu mutasha icilonganino no kulongana fikalenga umusambi ukufwaya ukusangwako.

³ Abapya balingile ukumfwikisha ukuti mu kuteyanya kwa kwa Yehova mwaba bamunyinefwe ba mwi sonde lyonse. Batambisheni vidio witwa Jehovah’s Witnesses—The Organization Behind the Name no wa Our Whole Association of Brothers. Nga tamwakwata, kuti mwabomfya broshuwa wa Inte sha kwa Yehova Mu Kwikatana Shicito Kufwaya kwa kwa Lesa mu Kusalala kwa Calo. Bafweni ukumfwikisha ukuti Yehova alebomfya amamilioni ya bantu abaipeela mu calo conse ku kufishapo ukufwaya kwakwe. Lekeni aba abapya beshibe ukuti na bo baleitwa ukubombela Lesa.—Esa. 2:2, 3.

⁴ Cilaleta insansa ishingi ukumona umusambi wa Baibolo aba musambi wine wine uwa kwa Yesu. E co tutungulwila amasambililo ya Baibolo!—3 Yoh. 4.