“Ni Kwi Ningasanga Inshita?”
1 E fyo fwe bengi tuilishanya pantu twakwata ifingi ifya kucita mu bumi. Batila inshita e cikwatwa cacindamisha kabili icipwa bwangu. E co, ni kwi twingasanga inshita ya kucite fintu ifyacindama icine cine, pamo nga ukubelenga no kusambilila Icebo ca kwa Lesa?—Fil. 1:10.
2 Icingatwafwa kusala ifyo tulefwaya ukucita mu nshita tukwete ukucila ukufwaya inshita na imbi. Bonse twakwata amaawala 168 mu mulungu, pali aya, 100 yaya ku kulaala na ku kubomba. E co, kuti twabomfya shani amaawala yashala pa kuti cituwamine sana? Pa Abena Efese 5:15-17 twakoseleshiwa ukuti twilaenda ‘nga batumpa iyo, kano nga ba mano, ukubomfye nshita . . . ukwiluka icabo kufwaya kwa kwa Shikulu.’ Ici cilelangilila ukuti tukabila ukubomfya inshita yonse twakwata ku kucita ifyo Yehova atila fyalicindama.
3 Yesu apashenye inshiku shesu ku nshiku sha kwa Noa. (Luka 17:26, 27) Abantu pali ilya nshita bapamfiwe ne mikalile ya cila bushiku. Lelo, Noa alisangile inshita ya kukuula icibwato cishaikulila no kushimikila. (Heb. 11:7; 2 Pet. 2:5) Asangile shani inshita? Pa kwangwa ukucita ukufwaya kwa kwa Lesa intanshi no kumumfwila pa kucita “conse ico Lesa amwebele.”—Ukute. 6:22.
4 Cinshi Mulingile Ukwangwa Intanshi? Yesu atile: “Te ku cilyo ceka umuntu ekalila no mweo, lelo ku cebo conse icifuma ku kanwa ka kwa Lesa.” (Mat. 4:4) Cila mulungu tulakwata “umulingo wa filyo [fya ku mupashi] mu nshita iiyene.” (Luka 12:42) Tufwile ukutantika ukubelenga no kusambilila lyonse pa kuti tumfwikishe fyonse no kunonkelamo icine cine. Pa kutasha pa filyo fya ku mupashi, tatulingile ukufimona nge filyo fya kulya lubilo lubilo, ifya kukwankwanya fye pa kubelenga nga fintu umo engalya ica kulya nga alefulumuka bamo. Lelo, ukutasha kwalinga kutucincisha ukuteka umutima pa kusambilila no kuipakisha ifya ku mupashi.
5 Ukulya ifya kulya fya ku mupashi kuti kwatuletela umweo wa muyayaya. (Yoh. 17:3) E ko tulingile ukwangwako intanshi pa fyo tucita cila bushiku. Bushe kuti twasange nshita ya kubelenga Baibolo no kupekanishisha ukulongana kwa Bwina Kristu? Ee kuti twaisanga. Lyene tukapokelela “icilambu icikalamba” icinonkwa pa kwishiba no kucita ukufwaya kwa kwa Lesa.—Amalu. 19:7-11.