Isukulu lya Butumikishi Ilya Bulesa Ilya mu 2002
1 Amaka twakwata aya kulanda cintu ico abantu abengi bashipoosako amano. Lelo, ukulanda ca bupe cafuma kuli Yehova. Kutulenga ukulanshanya na bantu bambi no kulondolola ifyo tuletontonkanya ne fyo tuleumfwa. Icapulamo sana ca kuti kutwafwa ukutasha Lesa wesu.—Amalu. 22:22; 1 Kor. 1:4-7.
2 Mu Isukulu lya Butumikishi Ilya Bulesa, abaume, abanakashi, na bana balakanshiwa ifya kubilisha ishina lya kwa Yehova. (Amalu. 148:12, 13) Muli programu we sukulu lya mu mwaka wa 2002 muli imitwe ya mu Baibolo iyalekanalekana iyo twinganonkelamo pa lwesu kabili iyo twingabomfya mu butumikishi. Ukupitila mu kupekanishisha ili sukulu no kulandapo, kuti twalundapo ukwishiba no kulamuka nga bakasambilisha wa Cebo ca kwa Lesa.—Amalu. 45:1.
3 Belengeni Baibolo Cila Bushiku: Lyonse nga tulakwata Baibolo lwa mupepi, kuti twabomfye nshita yonse iyo twashukila ukubelenga yene. Fwe bengi tulaba ne nshita iinono cila bushiku iyo twingabomfya mu kucite co. Mwandi cilanonsha ukubelengako fye nangu libula limo cila bushiku, na kuba ici e cikabilwa nga tatulefwaya ukushalila muli programu wa kubelenga Baibolo uwatantikwa mwi sukulu!—Amalu. 1:1-3.
4 Ukubelenga Baibolo bwino kuti kwatwafwa ukufika abaletumfwa pa mitima no kubacincisha ukutasha Yehova. Bamunyinefwe aba kulapeelwa Ilyashi Na. 2 mu sukulu balingile ukubelengelamo libela imiku ne miku kabili ukucite co mu kupongomoka. Kangalila we sukulu akalandapo ifyebo fya kutasha ne mitubululo ya kwafwa ukuwamyako ukubelenga.
5 Bomfyeni Icitabo ca Ukupelulula: Amalyashi Na. 3 na Na. 4 yakulafuma mu citabo ca Ukupelulula. Nakalimo fwe bengi tufwile ukubombesha ukubomfya ici ica kwafwa cibomba bwino mu butumikishi bwa mwi bala. Bankashi bafwile ukusala imitantikile iingabomba bwino mu cifulo cabo ica kushimikilamo. Kangalila we sukulu alingile ukwangwa sana ku fyo balesambilisha ne fyo balebomfya Amalembo.
6 Shi Isukulu lya Butumikishi Ilya Bulesa litwafwe bonse ukutwalilila ukubomfya ica bupe Lesa atupeela ica kulanda ku kuleka tubilishe imbila nsuma no kutasha Lesa wesu umukalamba, Yehova!—Amalu. 34:1; Efes. 6:19.