Programu Mupya uwa Kulongana kwa Muputule
1 Pa kwiminina abashangila muli cino calo icitelukateluka, tufwile ukutetekela Yehova. Kuti twalanga shani uko kutetekela mu mikalile yesu? Bushe ukutetekela Yehova kukuma shani imikalile ya pa lwesu ne ya lupwa? Kutwafwa shani ukucincintila ukusonga kwa calo ca kwa Satana? Programu wa kulongana kwa muputule ukwa mwaka wa mulimo uwa 2003 aleasuka ifi fipusho. Umutwe wa uyu programu uleti “Tetekeleni Yehova no Kucite Cisuma.”—Amalu. 37:3.
2 Tatutetekela fye Yehova mu nshita shaibela nelyo mu nshita ya mafya. Uku kutetekela kukuma imikalile yesu yonse. Ici cikakomailwapo mu lyashi lya kwiswila ilileti, “Tetekeleni Yehova Inshita Yonse.” (Amalu. 62:8) Ilyashi lya kukonkana ilikwete imbali shine ilileti “Ukulanga Ukuti Twalitetekela Yehova” likatulanga ifya kusanga no kubomfya ifyebo fya mu Baibolo ifingatwafwa ukutunguluka mu cupo, ukupwisha amafya yabako mu lupwa, e lyo no kukwata ifyo tukabila lwa ku mubili.
3 Icalo ca kwa Satana cesha ukunyonganya ifyo tumona icalungama ne calubana no kuleta icimfulumfulu pa cili icacindama ne cishacindama. (Esa. 5:20) Ilyashi lya kuti “Ibakeni ku Fintu Fya fye Ifya mu Bumi” ne lya kuti “Talukeni ku Fyabipa—Beni Bakacita wa Cisuma” yakakosha umupampamina wesu uwa kukonka ifipimo fyasumbuka ifya kwa Yehova.—Amose 5:14.
4 Lintu Yehova akapesha buno bwikashi bubifi, ababomfi bakwe bakakabila ukumutetekela umupwilapo. Ici cikalandwapo mu lyashi lya ku cintubwingi ilikalati, “Ukulubulwa Ukufuma mu Calo ca Macushi Nakupalama.” Pa numa ya ico, tukalaalikwa ukuibebeta mu lyashi likalati “Bushe Mukamonwa nga Balinga Ukwingila mu Bufumu bwa kwa Lesa?” Iyi programu ikasondwelela no kucincisha kwa kuti “Tetekeleni mu Malayo ya kwa Yehova.”
5 Icintu icikalamba pa kulongana kukalamba konse lyashi lya lubatisho. Bonse abalefwaya ukubatishiwa bafwile ukweba kangalila wa kutangilila bwangu bwangu pa kuti kwaba ukupekanya ifilekabilwa.
6 Muli shino nshita shalukaaluka, ni Yehova fye eka twingatetekela icine cine kabili e wingatulenga twaba abashangila. (Amalu. 118:8, 9) Bonse ifwe natukoshe ukutetekela kwesu muli Yehova pa kusangwa kuli programu onse uwa kulongana kwa muputule.