Ukulongana kwa Muputule Ukupya

Twalishiba ukuti Yehova Lesa awamina ukutemwa kwesu no kuipeelesha fye kuli wena eka. Lelo, lino isonde lilesha ukutubeleleka ukuti tununuke kuli bucibusa bwapalamisha twaba na bo na wene. (Yoh. 17:14) Pa kuti tukoshe ukutemwa twatemwa Yehova kabili pa kuti tukose mu kucincintila ifya pano isonde ifingonaula bumupashi bwesu, ukulongana kwa muputule ukupya ukwa mu mwaka wa mulimo uwa 2001 kukakwata umutwe uleti “Temweni Lesa—Mwitemwa Ifya Pano Isonde.”—1 Yoh. 2:15-17.

Ukutemwisha Yehova kutulenga ukushimika ubunte pa lwa wene. Nangu ni fyo, abantu ba kwa Lesa abengi tacabangukila ukubomba umulimo wa mwi bala. Mu lyashi likalati “Ukutemwa Lesa E Kutucincisha mu Butumikishi Bwesu,” mukasambilila ifyo abengi bacimfya insoni na mafya yambi pa kuti balebombako uyu mulimo mu kukumanina.

Ni shani ifyo imibele ya pano isonde iilebipilako itukuma? Ifintu ifyo kale fyalemonwa nge fyabipa nomba fimonwa nge fyaba fye bwino. Ilyashi lileti “Abatemwa Yehova Bapata Icabipa” na malyashi yakakonkana pa mutwe wa kuti “Ifya Pano Isonde—Bushe Tufimona Shani?” yakakosha umupampamina wesu uwa kukaana ulunkumbwa lwa kucita ifyalubana.

Kukaba Isukulu lya Butumikishi bwa Teokrasi no Kulongana kwa Mulimo, pamo no kusupawila icipande ca uyo mulungu ica mu Ulupungu lwa kwa Kalinda. Ilyashi lya cintubwingi ilikalati, “Ifyo Ukutemwa ne Citetekelo Ficimfya Pano Isonde,” likatukoselesha ukupashanya Yesu mu kucincintila amafya ya pano isonde. (Yoh. 16:33) Shininkisheni ukuti mwalaalikako abasambi benu aba Baibolo. Abalefwaya ukubatishiwa balingile ukweba kangalila wa kutangilila mu kwangufyanya pa kuti ifilekabilwa fingapekanishiwa.

Uku kulongana kwa muputule kukalenga tukatontomeshe sana pa kufwaya ukumona uko ukutemwa kwesu kulingile ukutonta mu kulungatika pa kuti twingaipakisha amapaalo yawamisha aya kwa Yehova. Mwikapuswako nangu panono!