Programu wa Kulongana kwa Muputule Ukupya

Umutwe wa programu wa kulongana kwa muputule ukupya ukwa nshiku shibili uukatendeka mu September aleti “Bakeni Amafunde ya kwa Lesa no Kuba no Mweo.” (Amapi. 4:4) Akakomaila pa mulandu ukubaka amafunde ya kwa Lesa kushabela cisendo. Ukulundapo, akalangilila ifyo ukucita ukufwaya kwa kwa Lesa kutupembesula, ukutusansamusha no kutupeela isubilo lya ku ntanshi.—Mat. 11:28-30; Yoh. 13:17.

Abalefwaya ukubatishiwa pa kulongana mu kumfwila ikambisho lya kwa Kristu balingile ukulanshanya na kangalila wa kutangilila, kabili e ukapekanya.—Mat. 28:19, 20.

Ilyashi lya kukonkana likalondolola inshila shibomba isho twingalangishishamo ukutemwa kuli Lesa na bamunyinefwe. (Yoh. 13:34, 35; 1 Yoh. 5:3) Ukufunda kukunta ukufuma pa Amalumbo 19 na 119 kukasanshiwamo muli programu. Nangu cingati ukufunda kwapuutwamo muli aya Amalumbo kwalembelwe kale sana, tukamona ifyo tunonkelamo ilelo.

Ilyashi lya pa cintubwingi ilikalandwa kuli kangalila wa citungu lileti “Bela Lesa Akatiina, Baka Amafunde Yakwe.” (Luk. Mil. 12:13) Ilyashi lya kulekelesha ilya kwa kangalila wa muputule likalangilila ifyo abacaice benganonkelamo mu bumi nomba no mulandu bengacetekela ukuba no mweo wa muyayaya. Kangalila wa citungu akasondwelela programu ukupitila mu kutantawila ubunonshi ubwingi ubwisa ukufuma mu kwikalilila ku “malango ya bufumu” aya kutemwa. (Yako. 2:8) Cine cine, uku kulongana uko uuli onse ashingafwaya ukupuswa!