Programu wa Kulongana kwa Muputule Ukupya
1 Programu wa kulongana kwa muputule ukupya uukatendeka mu September akalundulula umutwe wa kuti “Ipakisheni Insansa Shafulisha mu Kupeela.” (Imil. 20:35) Insansa shalondololwa pamo nga “ukuba uwa cimwemwe kabili uwaikushiwa.” Abantu abengi ilelo bashukila ubuseko ubuli bonse bengaba na bo mu bumi, kabili lintu baba aba buseko, ni pa kashita kanono fye. Isho te nsansa sha cine cine. Lelo, Yehova alatusambilisha ifya kuinonsha fwe bene kuli pe na pe. (Esa. 48:17; 1 Yoh. 2:17) Programu wa kulongana kwa muputule ukupya akakomaila pa fintu twinganonka insansa shafulisha ukupitila mu kupeela mu nshila ya ku mupashi.
2 Tukasambilila inshila shibomba isho twingaipeelelamo fwe bene mu butumikishi. Amalyashi yamo ayakapeelwa na bakangalila benda yakwete imitwe ileti: “Ukucita Ifibusa Kuli Mamone Uushalungama,” “Cindikeni Ukupayanya kwa Bulesa Ukwa ‘Fya Bupe mu Bantu,’” na “Ipakisheni Imbali Ishingi Isha Nsansa sha Cine Cine.” Abo balefwaya ukubatishiwa pa kulongana kwa muputule bafwile ukulanda kuli kangalila wa kutangilila pa kuti engatantika baeluda ba kupituluka na bene mu fipusho fya baleya ku lubatisho. Ukubombela Yehova mu kwampana kwasanguluka kukalenga ababatishiwa abapya ukuba aba nsansa apakalamba.
3 Ukwishiba kwalinga ukwa maka ya kwa Yehova na ko kwine kulaleta insansa no mutelelwe. Abantu bonse balekabila ukwishiba ici. E ico, ilyashi lya cintubwingi pa kulongana kwa muputule likalundulula umutwe wa kuti “Ikataneni na Bantu ba Nsansa Aba kwa Lesa.” Shininkisheni ukulaalikako abo bonse ababa no buseko mu cine ukwisa kuli ili lyashi. Tabaasanga umutelelwe wa cine cine ne nsansa shibelelela mu kuteka kwa bantunse muli ici calo icalaala mu maka ya kwa Satana. (Luk. Mil. 8:9) Lelo mwandi bakasanga ubuseko mu kubishanya na bantu ba nsansa aba kwa Yehova!——Ilu. 144:15b.
4 Te mulandu ne mibele ilebipilako muli ino micitile ya fintu, abo baba ne nsansa shafulisha mu kupeela lwa ku mupashi tabakabale abalengwa insoni kuli Lesa wa nsansa. (1 Tim. 1:11) Programu wa kulongana kwa muputule ukupya akalangilila ici ukuba ica cine. Mwikapuswako!