Ukulongana kwa Muputule Ukukatwafwa Ukucingilila Bucibusa Bwesu na Lesa
1. Kupekanya nshi kumo uko Yehova atucitila ukutwafwa ukubomba bwino umulimo twapeelwa uwa kushimikila imbila nsuma?
1 Yehova lyonse alatupeela ifyebo, alatukansha, kabili alatukoselesha pa kuti tubombe bwino umulimo atupeela uwa kushimikila imbila nsuma. (Mat. 24:14; 2 Tim. 4:17) Ukulongana kwa muputule uko tukwata cila mwaka e nshila imo Yehova atupeelelamo ifyebo, atukanshishamo no kutukoselesha. Ukulongana kwa muputule ukwa mwaka wa mulimo uwa 2010 kukalalanda pa mutwe uukalati, “Cingilileni Bucibusa Bwenu na Lesa,” ukashimpwa pa Abena Roma 8:5 na Yuda 17-19. Uku kulongana kukatendeka mu mulungu wa August 31, 2009.
2. (a) Ni muli finshi umo ukulongana kwa muputule kukatwafwa? (b) Bushe ukulongana kwa muputule ukwapita kwamwafwile shani mu mulimo wa kushimikila?
2 Ifyo Ukulongana kwa Muputule Kukatwafwa: Uku kulongana kukatwafwa ukwishiba amafya, pamo nga ifingatupwishisha inshita e lyo ne fingalenga twafilwa ukubika amano ku fintu ifyacindama icine cine. Tukasambilila ifya kucimfya amano ya kufwaya fye ukulaicitila ifyo tulefwaya, kabili tukasambilila na pa fyo cipilibula ukuba umuntu wa bumupashi. Ilyashi lya kukonkana ilikabako pa Mulungu likalanda pa fyo abantu umo umo nelyo indupwa bengacita pa kukosha bumupashi bwabo nga bakwata amafya na mesho ayakalamba ayesha icitetekelo. Uku kulongana kukatwafwa ukulacingilila imitima yesu, ukuba abakosa ku mupashi, no kulatontonkanya lyonse pa mapaalo ayakalamba ayo bonse abacingilila bumupashi bwabo bakaipakisha.
3. Ni lilali mukalongana ukulongana kwa muputule, kabili finshi mulepanga ukucita?
3 Ilyo fye mwaishiba ilyo mukalongana ukulongana kwa muputule ukukonkelepo no ko kukabela, tampeni ukulaipekanya pa kuti mukasangwe ku kulongana konse no kulakutikisha. Mwishibe ukuti Yehova, alapaala abantu abacincila.—Amapi. 21:5.
4. Finshi tukasambilila pa kulongana kwa muputule uko tukakwata?
4 Ukwabula no kutwishika Yehova e upekanya uku kulongana kushaiwamina. Ukulongana kwa muputule uko umusha wa cishinka apekenye kuli no kumwafwa ukutwalilila ukulashimikila. Tulatasha Yehova pa fisuma ifyo atupekanishisha ifitwafwa ‘ukutwalilila ukulanda pe subilo lyesu ku bantu bonse ukwabula ukunenuka.’—Heb. 10:23-25; Yako. 1:17.