Programu wa Kulongana kwa Muputule Ukupya

¹ Umutwe uukalundululwa muli programu wa kulongana kwa muputule ukupya ukukatendeka mu September uleti “Loleni, Iminineni Ndi, Koseni.” Ushimpilwe pa mashiwi ya mutumwa Paulo aya kukoselesha ku Bena Kristu ba mu mwanda wa myaka uwa kubalilapo ayalembwa pali 1 Abena Korinti 16:13.

² Programu akatendeka pa kwebekesha ukukabila kwesu ukwa lyonse ukwa kuiceeceeta lwa ku mupashi. Ukusungilila ukwiminina kwakosa ku calungama muli ishi “nshiku sha kulekelesha” cifwaya ukupimununa kwashininkishiwa ukwa kwampana kwesu na Yehova no kwiminina kwesu no kuteyanya kwakwe ukwa pe sonde. (2 Tim. 3:1) Tukacinkulwako pa lwa kutesekesha kwa kwa Lesa pa kubombesha kwesu konse. Tukabila ukusambilishiwa inshila sha kuwamishamo imibele yesu iya Bwina Kristu no kusungilila imyendele ya ca kumwenako.

³ Ukukabila kwa kuba abapimpa mu mulimo wa kupanga abasambi ilintu tuletinamina ukulunduluka kwa ku mupashi ne cishingamo na ko kukakomailwapo. Imitubululo ibomba pa fyo abantu umo umo ne ndupwa bengasungilila programu wa kuliishiwa kwa ku mupashi uwa lyonse ikapeelwa mu malyashi yalekanalekana, ifilangililo, no kulanshanya.

⁴ Pa Cibelushi abasambi bafikapo bakaba na maka ya kucito kulumbula kwa pabuuta ukwa kuipeela kwabo ukupitila mu lubatisho lwa mu menshi. Lyene, pa Mulungu ifwe bonse tukafwaya ukubako ku lyashi lya cintubwingi, ilikwete umutwe wa kuti “Cinshi Caba E Kwiminina Kobe na Lesa?”

⁵ Programu akasondwelela mu kuba no kukoselesha ku kwiminina ndi mu citetekelo, lyonse ukubomba na umo no munankwe mu mupashi wa kutemwa no mutende. Ukulongana kwa muputule ni kumo ukwa mashuko ya mu nshita ayengi Yehova apayanishisha ifwe bonse ku ‘kucincimushanya ku kutemwa kabili ku kubombe milimo isuma.’ (Heb. 10:24, 25) Cita amapekanyo yashininkishiwa ku kubapo kuli programu onse pa nshiku shonse shibili.