Cingilileni Amatontonkanyo Yenu
1. Bushe ukulongana kwa muputule ukwa mu mwaka wa mulimo uwa 2013 kuleti shani, kabili mulandu nshi bapekanishishe uku kulongana?
1 Yesu aebele abasambi bakwe ukuti baletemwa Yehova ne mutima yabo yonse, ne myeo yabo yonse, no kutontonkanya kwabo konse. (Mat. 22:37, 38) Ukulongana kukalamba konse ukwa uno mwaka bakupekenye ukuti kukatwafwe ukukosha ubuntu bwesu ubwa mukati. Ukulongana kwa citungu kuli no mutwe uuleti, “Sunga Umutima Obe!” Ukulongana kwaibela ukwa mwaka wa mulimo uwa 2013 kuli no mutwe uuleti, “Cingilileni Kampingu Yenu.” E lyo ukulonga kwa muputule ukukatendeka umweshi uleisa, kukakwata umutwe uufumine pali Mateo 22:37 uuleti, “Cingilileni Amatontonkanyo Yenu.” Uku kulongana bakupekanishishe ukwafwa cila muntu ukulabebeta amatontonkanyo yesu pa kuti ifyo tuletontonkanya filelenga Yehova ukulasekelela sana.
2. Fipusho nshi fikasukwa pa kulongana?
2 Finshi Fikalandwapo: Ilyo tukaba pa kulongana, tukapooseko amano ukufwa ifyasuko kuli ifi fipusho ifyacindama:
• Kuti twacita shani pa kuti tatuletontonkanya ‘amatontonkanya ya bantu’?
• Kuti twacita shani pa kufimbula icifimbo capofwisha amatontonkanyo ya bashatetekela?
• Mutima wa kwa nani tulingile ukukwata?
• Busuma nshi bwaba mu kwetetula?
• Kuti twacita shani pa kuti Yehova aletungulula amatonkanyo yesu?
• Finshi abalume, abakashi, abafyashi, na bana bengacita pa kuti mu lupwa muleba insansa?
• Kuti twaipekanishisha shani ubushiku bwa kwa Yehova?
• Kuti twateyanya shani imitima yesu ku kubombesha?
• Mapaalo nshi abakonka ifyo basambilila bakwata?
3. Mulandu nshi tufwile ukusangilwa ku kulongana inshiku shonse shibili, kabili mulandu nshi ukukutikisha no kubomfya ifyo tusambilila kwacindamina?
3 Satana alelwisha sana pa kuti onaule amatontonkanyo yesu. (2 Kor. 11:3) Kanshi tulingile ukucingilila amatontonkanyo yesu no kuyalama. Tufwile ukutwalilila ukukwata umuntontonkanya wa kwa Kristu e lyo no kuicingilila ku fingonaula umuntontonkanya wesu. (1 Kor. 2:16) Kanshi pekanyeni ukuti mukasangweko kuli uku kulongana kwa muputule inshiku shonse shibili kabili mukalekutikisha. Ukubomfya ifishinka tukasambilila pa kulongana kukatwafwa ukuteyanya imitima ku kubombesha mu mulimo ya Bufumu.—1 Pet. 1:13.