Ifyo Bapekanishisha Bakapyunga Abena Kristu

1. Cintu nshi catendeke mu 1938, kabili mulandu nshi cabeleleko?

¹ Mu 1938, Ukuteyanya kwa kwa Yehova kwaleteleko icintu cimo icipya. Abantu abengi mu filonganino fyalekanalekana balibetile ukuti bonse bakasangwe ku kulongana kukalamba. Mulandu nshi kwabelele uku kulongana? Ulupapulo ulo baleita ati Informant ulwa mu January 1939 lwayaswike ati: “Uku kulongana kukalamba kwaba pa fyo ukuteyanya kwa kwa Yehova kwapekanya pa kuti tulebomba bwino umulimo wa Bufumu. Ifyo tusambilila pali uku kulongana filatwafwa bonse pa kuti tulebomba bwino umulimo uo batupeela.” Nga twatontonkanya pa fyo bakasabankanya ba Bufumu bafulile ukufuma pali 58,000 mu 1938 ukufika kuli 7,000,000 no kucilapo mu 2009, kuti twasumina ukuti kulya kulongana uko baleita ati ukulongana kukalamba, uko nomba twita ati ukulongana kwa muputule kwalibomba umulimo uukalamba uwa kwafwilisha bakapyunga ba kwa Lesa ‘ukubomba umulimo bapeelwa’!

2. Malyashi nshi yakabako pa kulongana kwa muputule mu mwaka wa mulimo uuleisa?

² Umutwe wa Kulongana Muli uyu Mwaka Uuleisa: Tulefuluka nga nshi ukulongana kwa muputule ukukatendeka mu September kabili ukukatukoselesha. Umutwe ukalati: “Tamuli Ba Muli Ici Calo” kabili ufumine pe lembo lya Yohane 15:19. Malyashi nshi yamo yamo ayakakoselesha bakapyunga Abena Kristu? Pa Cibelushi tukomfwa ilyashi ilikalatila, “Umulimo wa Nshita Yonse Utucingilila Shani?” Tukakwata ne lyashi lya kukonkana ilikalatila “Mikoweshiwa na . . .” “Iciswango,” “Cilende Mukalamba,” e lyo na “Bashimakwebo.” Pa Mulungu tukomfwa ilyashi lya kukonkana ilikakwata umutwe wa kuti “Temweni Yehova, Mwitemwa Icalo.” Amalyashi yambi ayakabako ni aya: “Ubufumu bwa kwa Kristu ‘Te bwa Pano Calo,’” “Twalilileni Ukulaikala nga ‘Abalebeshi,’” e lyo na “Shipeni! Kuti Mwacimfya Icalo.”

3. Kuti twanonkelamo shani nga twasangwa ku kulongana kwa muputule?

³ Ilyo nkashi umo uwalekele ukubombesha mu mulimo wa kushimikila asangilwe ku kulongana kwa muputule ukwa nomba line, alembele ukuti uku kulongana kwamulengele ukutontonkanya sana pa fyo imikalile yakwe yali, kabili apampamine pa “kulaya lyonse mu mulimo wa kushimikila no kuleka ukulakwata umwa kubepekesha!” Ukwabula no kutwishika ukulongana kwa muputule ukwa mwaka wa mulimo uuleisa kukatwafwa bonse fye ukutemwa Yehova ukucila ukutemwa icalo. (1 Yoh. 2:15-17) Mwikapuswa ku kulongana kabili mukalekutikisha pa kuti mukaipakishe ifi fintu fisuma ifyo bapekanishishe bakapyunga Abena Kristu!